कनकाई खबर \ झापाको कनकाई नगरपालिकाले पशुपंक्षी तथा मत्स्य विकास शाखाको कार्यालय सुरुङ्गामा स्थापना गरेको छ ।
यस अघि कनकाई वडा नं.३का वडाअध्यक्ष युवराज चम्लागाईँको घरमा कोठाभाडा लिएर संचालन भइरहेको शाखा कार्यालय गत भदौ २४ गतेको जेनजी आन्दोलनका क्रममा तोडफोड र आगजनी भएपछि बैकल्पीक व्यवस्थाको खोजी गरी सुरुङ्गामा भएको खाली भवन प्रयोगमा ल्याइएको हो । सुरुङ्गाको नयाँ सब्जी बजार उत्तर साथै सुरुङ्गा खानेपानीको कार्यालय दक्षिणको खाली ठाउँमा प्रयोग बिहिन अवस्थामा रहेको स्टोर सहित पाँच कोठे भवनबाट पशुपंक्षी तथा मत्स्य विकास शाखाको कार्यालय संचालनमा ल्याइएको शाखा कार्यालयका भेटनरी अधिकृत कुलबहादुर गुरुङले जानकारी दिए ।
ईलाका प्रहरी कार्यालय सुरुङ्गाका लागि निर्माण गरिएको भवन प्राविधिक समस्याको कारण प्रहरी कार्यालय संचालनमा आउन नसकेपछि तत्कालको समस्या समाधान गर्दै पशुपंक्षी तथा मत्स्य विकास शाखाको सेवा संचालनमा ल्याइएको बताइएको छ । एक संक्षिप्त कार्यक्रमका बीच कनकाई नगरपालिकाका प्रमुख राजेन्द्रकुमार पोखरेलले शाखाको उद्घाटन गरेका थिए ।
उद्घाटन विशेष कार्यक्रममा कनकाई नगरपालिकाकी उपप्रमुख आशा शिवाकोटी, प्रमुख प्रशासकीय अधिकृत नारायण न्यौपाने, कनकाई वडा नं.२ का वडाअध्यक्ष बलराम राई, कार्यपालिका सदस्य एवं कृषि विकास तथा प्रवद्र्धन उपसमिति संयोजक कृष्णमाया भुजेल, कार्यपालिका सदस्य नवलकिशोर दत्त, वडासदस्य अनिल गोयल, कनकाई कृषि बजार व्यवस्थापन समिति संयोजक डिल्ली उप्रेती लगायत कनकाई नगरपालिकाका विभिन्न तहका कर्मचारीहरुको समेत उपस्थिती रहेको जनाइएको छ। कनकाई नगरपालिकाकी कर्मचारी जमुना कटुवालले संचालन गरेको कार्यक्रममा शाखाका भेटनरी अधिकृत कुलबहादुर गुरुङले औचित्य सहित कार्यक्रममा उपस्थित सबैलाई शाब्दीक स्वागत गरेका थिए ।
