गोपी मिश्र, (तेह्रथुम)
कनकाई खबर \ साहित्य संगम आठराई एवं नारायणी मेमोरियल फाउन्डेसन झापाको संयुक्त आयोजनामा तेह्रथुममा छात्रवृत्ति वितरण , सम्मान साथै बृहत साहित्यिक कार्यक्रम सम्पन्न भएको छ ।
तेह्रथुम बहुमुखी क्याम्पसको सभाहलमा सोमबार सम्पन्न कार्यक्रममा विद्यालय ÷क्याम्पस स्तरीय कविता प्रतियोगिता गरिएको थियो । प्रतियोगितामा प्रणामी माविका बिद्यार्थी दृष्टि मैनाली प्रथम , तेह्रथुम बहुमुखी क्याम्सका बिद्यार्थी भावना बाँस्कोटा द्वितीय र कृष्ण मावि डाडाँगाउँका विद्यार्थी एन्जल निरौला तृतीय भएका थिए ।
उनीहलाई नगद पुरस्कार क्रमशः दुईहजार , एक हजार पाँचसय र एकहजार साथै प्रमाण पत्र प्रदान गरिएको बताइएको छ । त्यस्तै प्रतियोगितामा सहभागी सबै प्रतियोगीलाई सान्त्वना पुरस्कार नगद पाँच सय र प्रमाण पत्र प्रदान गरिएको थियो।
कार्यक्रमका अध्यक्ष राजन तिम्सिना, प्रमुख अतिथि आठराई गाउँपालिकाका उपाध्यक्ष वलिराज इङ्नाम लगायत अन्य अतिथिहरुले पुरस्कार वितरण गरेका थिए।
कार्यक्रममा नारायणी मेमोरियल फाउन्डेसन स्थापना भए यता हरेक बर्ष पुर्वका ४ जिल्ला झापा , मोरङ्ग , तेह्रथुम र ताप्लेजुङमा बितरण गर्दै आएको शैक्षिक छात्रवृत्ति अन्तरगत तेह्रथुममा वितरण गरिने छात्रवृत्ति समेत वितरण गरिएको थियोे । जस अन्तर्गत तेह्रथुमका बिभिन्न पालिकाका विद्यालयबाट छनौटमा परेका २५ जना विद्यार्थीलाई छात्रवृत्ति प्रदान गरिएको छ ।
यो छात्रवृत्ति पहिलो बर्ष २५ जना विद्यार्थीबाट सुुरु गरिएको, अहिले ८४ जना विद्यार्थीलाई दिईदै आएको र हरेक बर्ष छात्रवृत्ति पाउने बिद्यार्थी संख्या थपिदै गएको बताइएको छ । छात्रवृत्ति प्राप्त गर्ने सफल विद्यार्थीलाई कक्षा ६ बाट सुरु गरी कक्षा १२ पास गर्दा सम्म हरेक बर्ष निरन्तर छात्रवृत्ति प्रदान गरिदै आएको बताइएको छ।
त्यस्तै कार्यक्रममा साहित्य संगम आठराईका संस्थापकहरुलाई सम्मान गरिएको छ । सम्मानित हुनेहरुमा साहित्य संगम आठराईका संस्थापक सचिव शेरबहादुर इङनाम, कोषाध्यक्ष पूर्व कुलपति गंगाप्रसाद उप्रेती,सदस्यहरु नरेन्द्रकुमार कार्की , डिल्लीप्रसाद सिटौला , तेजप्रसाद सिटौला , हरिभक्त सिटौला , यज्ञराज प्रसाई र नेम फाउन्डेसनका संस्थापक नरेन्द्रप्रसाद पाठकलाई सम्मान गरिएको छ भने कवि अनिरुद्र साहित्य पुरस्कारबाट साहित्यकार विजयसागर सुब्बालाई सम्मान गरिएको छ ।
कार्यक्रमकै अवसरमा साहित्य संगम आठराईको सातौं अधिवेशन समेत सम्पन्न भएको छ । अधिवेशनबाट अध्यक्षमा अम्बिका चुडाल थपलिया , उपाध्यक्षमा गोपीचन्द्र मिश्र , सचिवमा मदन गुरुङ , सहसचिवमा कमल तिम्सिना र कोषाध्यक्ष झुमा दुलाल सहित ९ सदस्य नयाँ कार्यसमिति सर्वसम्मत रुपमा चयन गरिएको निर्वाचन समितिका संयोजक भीमप्रसाद घिमिरेले जानकारी दिए ।
