कनकाई खबर \ झापाको विर्तामोड २ स्थित चारपानेमा मुख्य कार्यालय रहेको सहारा नेपाल साकोसको दुर्गापुर सेवाकेन्द्रले च्याउ खेती प्रविधि तथा व्यवस्थापन सम्बन्धी एकदिवसीय तालिम सम्पन्न गरेको छ ।
कनकाई १स्थित गरमकाली मन्दिरको सामुदायिक भवनमा सेवा केन्द्र दुर्गापुर अन्तर्गत रहेका विभिन्न नौ वटा समूहमा रहेका महिलाहरुको प्रतिनिधिमूलक सहभागितामा बिहिबार एक विशेष कार्यक्रमका बीच तालिम सम्पन्न भएको हो । संस्थामा आवद्ध सदस्यहरुलाई आयआर्जनका कार्यक्रमहरुमा जोड्दै आत्मनिर्भर बनाउँने उद्येश्यका साथ संस्थाले विभिन्न किसिमका तालिम संचालन गर्दै आएको सेवा केन्द्र दुर्गापुरका प्रमुख जीवनकुमार सुवेदीले जानकारी दिए । संस्थाको वस्तु तथा सेवाको बारेमा सहभागीहरुलाई थप जानकारी दिँदै सेवा केन्द्र प्रमुख सुवेदीले तालिममा सिकेका ज्ञानलाई व्यवहारमा उतार्न सहभागीहरुलाई आग्रह गर्दै च्याउ खेतीलाई आयआर्जनको प्रभावकारी माध्यम बनाउन सकिने विश्वास व्यक्त गरे ।
गरमकाली सहारा महिला समूहको समूह नं.५५ की अध्यक्ष दिल्लीमाया नेपालको अध्यक्षता एवं बरिष्ठ कृषि अधिकृत राजेन्द्र खरेलले सहजीकरण गरेको तालिममा पशु प्राविधिक प्रवीण कोइरालाले पशुपन्छीमा हुने समस्या र त्यसको समाधानका विषयमा समेत सहभागीहरुलाई जानकारी गराएका थिए ।
सेवा केन्द्र दुर्गापुरका कर्मचारीहरु मुना पुरी र विष्णु माया खड्का लगायतको उपस्थिती रहेको औपचारिक कार्यक्रमको सञ्चालन संस्थाका पशु प्राविधिक विनोद दाहालले गरेका थिए ।
