कनकाई खबर \ झापामा जेनजी प्रदर्शनका क्रममा जिल्लाका विभिन्न प्रहरी कार्यालयको भवन र सवारीसाधन तोडफोड, आगजनी र लुटपाटमा संलग्नहरुलाई आपराधिक उपद्रव र ज्यान मार्ने उद्योग कसुरमा मुद्दा दर्ता गरी अनसन्धान सुरु गरिएको छ ।
झापा प्रहरीका अनुसार जिल्ला अदालबाट म्याद लिएर अनुसन्धान कार्य भइरहेको झापाका प्रहरी प्रवक्ता खगेन्द्र खड्काले जानकारी दिए । पक्राउ परेका १२ जनामध्ये विर्तामोड–५ का ४५ वर्षीय नवराज राईविरुद्ध ज्यान मार्ने उधोगमा मुद्धा दर्ता गरिएको छ भने बाँकी ११ जना विरुद्ध आपराधिक उपद्रवमा मुद्धा दर्ता गरी अनुसन्धान भइरहेको छ ।
प्रदर्शनका क्रममा गत भदौ २४ गते झापाको अनारमनी, कनकाई र दमकस्थित इलाका प्रहरी कार्यालयमा आगजनी, तोडफोड, लुटपाट र प्रहरी कर्मचारीमाथि साङ्घातिक आक्रमणका घटना भएका थिए । सो घटनाको सिसीटिभी फुटेज, भिडियो र फोटोका अध्ययन र विश्लेषणका आधारमा अभियुक्तको पहिचान गरी नियन्त्रणमा लिइएको जिल्ला प्रहरी कार्यालयका प्रवक्ता खगेन्द्रबहादुर खड्काले जानकारी दिनुभयो ।
पक्राउ पर्नेहरूमा सोही वडाका २२ वर्षीय राजन चौधरी, सोही वडाका २० वर्षीय आयूष धिमाल, कनकाई–१ का ४२ वर्षीय गोपाल सङ्ग्रौला, कनकाई–३ का २५ वर्षीय विष्णु विक, शिवसताक्षी–१० का २५ वर्षीय कुशल तिम्सिना, सोही वडाका ३१ वर्षीय सञ्जय बस्नेत, विर्तामोड–५ की २४ वर्षीया पूजा मगर र अर्जुनधारा–७ का २८ वर्षीय सुरज राई छन् ।
त्यसैगरी, दमक–३ का १९ वर्षीय रियाज सिलवाल, इलामको चुलाचुली–३ का २२ वर्षीय नकुल अधिकारी र पाँचथर मिक्लाजुङ–५ घर भई हाल दमक–१ मा बसोबास गर्दै आएका २२ वर्षीय साजन ल्हागुनसमेत पक्राउ परेको प्रहरीले जनाएको छ ।
