कनकाई खबर \ झापाको कनकाईमा नेकपा एमालेले ५५ सदस्यीय नगरस्तरीय सुरक्षा दस्ता गठन गरेको छ ।
गत भदौ २३ र २४ गते जेनजी आन्दोलनका नाममा देशव्यापी रुपमा भएको तोडफोड र आगजनीप्रति खेद प्रकट गर्दै एमाले कनकाई नगर कमिटीले आगामी दिनमा यस्ता किसिमका अवाञ्छीत गतिविधिका विरुद्ध प्रतिवाद गर्ने भन्दै नगरस्तरीय सुरक्षा दस्ता गठन गरेको जनाइएको छ ।
नेकपा एमाले जिल्ला कमिटी झापाका सदस्यद्वय पार्टीका युवा नेता विनोद राणा संयोजक र अर्का युवा नेता दीपक चापागाईं सहसंयोजक रहनेगरी नगरस्तरीय सुरक्षा दस्ता गठन गरिएको हो ।
जेनजीका नाममा भएको आन्दोलनमा नेकपा एमालेका धेरैजसो नेता तथा कार्यकर्ताहरु साथै एमालेबाट निर्वाचित जनप्रतिनिधिहरूको घरमा भएको तोडफोड र आगजनीप्रति पार्टीले खेद प्रकट गर्दै दोषीलाई कडा कारबाहीको माग गरिएको नव गठित सुरक्षा दस्ताका संयोजक रानाले जानकारी दिए ।
समाजमा फैलिएको अराजक गतिविधि एवं विकृति विसंगतिका विरुद्ध एमालेका नेता तथा कार्यकर्ता, शुभचिन्तक तथा आम कनकाईबासीको सुरक्षाका निम्ति नेकपा एमाले सतिशाल झैं स्थिर भएर अघि बढ्ने प्रतिवद्धता जनाउँदै नवगठित सुरक्षा दस्ताका सहसंयोजक चापागाईँले पार्टीका सबै तहका नेता तथा कार्यकर्ताहरुलाई सतर्क रहन अनुरोध गरे ।
एमाले जिल्ला कमिटी झापाका सदस्य एवं सुरक्षा दस्ताका संयोजक विनोद राणाको अध्यक्षता एवं जिल्ला कमिटी झापाका उपाध्यक्ष शिव ढुंगेलको प्रमुख आतिथ्य रहेको नगर कमिटीको विशेष कार्यक्रममा कनकाई नगरपालिकाका नगर प्रमुख राजेन्द्रकुमार पोखरेलले आन्दोलनका विषयमा भएका गतिविधिको जानकारी गराएका थिए । कार्यक्रमको सञ्चालन सहसंयोजक दीपक चापागाईंले गरेका थिए ।
