झापा \ झापा शिवसताक्षी १० का ३२ बर्षिय सरोज शर्माको शव गाडिएको अवस्थामा शनिवार फेला परेको छ ।
गाडि सहित गत आईतबारदेखि वेपत्ता बनेका शर्माको शव झापा गाउँपालिका–५ पन्थापाडास्थित हुलाकी राजमार्ग अन्तर्गत बिरिङ खोलाको पुलमुनी गाडिएको अवस्थामा फेला परेको हो । ३२ वर्षीय शर्माले चढ्ने बागमती प्रदेश ०१–०३ च ७१९४ नम्बरको कार शुक्रबार मेचीनगर–१३ स्थित हातेमालो सामुदायिक वनभित्र बेवारिसे अवस्थामा आगो लगाएर खरानी भएको अवस्थामा भेटिएको थियो ।उनी बेपत्ता बनेदेखि नै खोजी कार्य तीव्र बनाएको प्रहरीले जनाएको छ ।
शर्माको हत्यामा संलग्न भएको आरोपमा प्रहरीले दुई जनालाई पक्राउ गरेको छ। पक्राउ पर्नेमा शिव शताक्षी नगरपालिका १० माईधार निवासी २५ वर्षीय सुनिल शाह र २६ वर्षीय राहुल शाह रहेको जिल्ला प्रहरी कार्यालय झापाले जनाएको छ ।
यसैबीच स्थानीय युवाहरूले पक्राउ परेका सुनिल साहको माइधारको घरमा ढुङ्गा मुढासहित तोडफोड गरेका छन् ।
