कनकाई खबर \ झापाको सुरुङ्गामा रोटरी क्लव सहितका चारवटा संस्थाको साझेदारीमा स्मार्ट कम्प्युटर कक्षा संचालनमा ल्याइएको छ ।
नमुना विद्यालयका रुपमा विकास भएको कनकाई ३ सुरुङ्गास्थित कनकाई माध्यमिक विद्यालयमा बिहिबार (सेप्टेम्बर २५) का दिन १५ लाख भन्दा बढीको लागतमा २१ थान कम्प्युटरको व्यवस्थापन गर्दै स्मार्ट कम्प्युटर कक्षा संचालनमा ल्याइएको हो । रोटरी क्लव अफ सुरुङ्गा सहित रोटरी डिष्ट्रिक ३२९२, एडु टेक नेपाल र कनकाई मावि सहितको साझेदारीमा स्मार्ट कक्षा संचालनमा आएको बताइएको छ \ शिक्षासँग प्रविधिलाई जोड्ने रोटरीको प्रयास अन्तर्गत क्लवले सेप्टेम्बर महिनामा गर्ने कार्यक्रमका रुपमा एक विशेष समारोहका वीच स्मार्ट कम्प्युटर कक्षा संचालनमा ल्याइएको रोटरी क्लव अफ सुरुङ्गाका अध्यक्ष डिल्लीराम मैनालीले जानकारी दिए ।
क्लवका अध्यक्ष मैनालीको अध्यक्षता एवं कनकाई नगरपालिकाका प्रमुख राजेन्द्रकुमार पोखरेलको प्रमुख आतिथ्य रहेको विशेष समारोहमा रोटरी रिजन ७ का डिष्ट्रिक जोइन सेक्रेटरी सुजन प्रधान , कनकाई माध्यमिक विद्यालय व्यवस्थापन समितिका अध्यक्ष चन्द्रप्रसाद प्रसाईँ, प्रधानाध्यपक कर्णबहादुर डाँगी, सल्लाहकार संयोजक जनार्दन उप्रेती, पिटिए अध्यक्ष खगमाया चापागाईँ, कनकाई वडा नं.३ की कार्यबाहक वडाअध्यक्ष कृष्णमाया भुजेल , रोट्रयाक्ट क्लव अफ सुरुङ्गाका अध्यक्ष डाक्टर मुकेश शाह, सचिव कृष्टि खतिवडा, स्थानीय जनप्रतिनिधि तथा साझेदार संस्थाका प्रतिनिधिहरू सहित रोटरी क्लव अफ सुरुङ्गाका पुर्व अध्यक्षहरु एवं पदाधिकारीहरुको समेत उपस्थितिमा सम्पन्न विशेष कार्यक्रमका बीच स्मार्ट कम्प्युटर कक्षा औपचारिक रूपमा उदघाटन गरिएको हो ।
स्मार्ट कम्प्युटर कक्षा उद्घाटन गर्दै कार्यक्रमका प्रमुख अतिथी कनकाई नगरपालिकाका प्रमुख पोखरेलले प्रविधिमैत्री शिक्षाको आवश्यकता र प्रभावबारे प्रकाश पारेका थिए । कनकाई नगरीलाई शिक्षाको हब बनाउँने योजना अनुरुप कनकाई नगरपालिकाले गतिविधि गरिरहेको प्रमुख अतिथी पोखरेलले कार्यक्रममा जानकारी दिए । विद्यालयका प्रधानाध्यापक कर्णवहादुर डाँगीले आगामी दिनमा डिजिटल शिक्षालाई अझ प्रभावकारी बनाउने योजना रहेको जानकारी दिए ।
स्थानीय समुदाय, अभिभावक तथा विद्यार्थीहरूमा स्मार्ट कक्षा सञ्चालनले उत्साह थपेको बताइएको छ । प्रविधिको प्रयोग मार्फत सिकाइलाई सहज, रोचक र प्रभावकारी बनाउने अपेक्षा राखेको कार्यक्रममा सहभागीहरुले बताए । रोटरी क्लव अफ सुरुङ्गाका निवर्तमान अध्यक्ष लुवराज उप्रेतीले स्वागत सहित औचित्यमाथि प्रकाश पारेको कार्यक्रमको संचालन क्लवका सचिव रामप्रसाद निरौलाले गरेका थिए ।
