कनकाई खबर \ दशैंको रौनक सुरु हुनै लाग्दा हरेक पालिकाहरुमा भएको विध्वंसकारी घटनाले हरेक नागरिकलाई स्तब्ध बनाएको छ ।
जेनजीको नाममा भएको आन्दोलनको क्रममा आगजनीका कारण जलेर नष्ट भएका पालिका संरचनाहरूको अवशेषबीच जनप्रतिनिधि, कर्मचारी तथा नगरप्रहरीले एकजुट भई सरसफाई अभियान सञ्चालन गरेका छन् ।
सरसफाई कार्यमा आँफै पनि सक्रिय देखिएका कनकाई नगरपालिकाका प्रमुख राजेन्द्रकुमार पोखरेलले घटनाप्रति गहिरो दुःख व्यक्त गर्दै भने, “दशैंको बेला आम जनताहरु सेवा पाउने आशामा बसेका थिए, तर हामीले सेवा दिने संरचनाहरू नै गुमायौं । यस असहज परिस्थितीमा पनि जनतालाई छिटोछरितो सेवा दिने प्रयासमा कनकाई नगरपालिकाका सम्पूर्ण जनप्रतिनिधि, कर्मचारी एवं नगर प्रहरीहरु समेत नगरपालिका कार्यालय सहित वडा कार्यालयहरुको पुनः निर्माणको कार्यमा अघि बढेका छौं ।”
नगरप्रमुख पोखरेलले नगरवासीलाई एकता, सहिष्णुता र पुनःनिर्माणको कार्यमा सकारात्मक बन्न अनुरोध गर्दै भने, “हामी यो चाडपर्वलाई पीडाबाट पुनः आशामा बदल्नेछौं।”
सफा नगर एवं सशक्त संकल्पका साथ घटनास्थलमा नगरप्रमुख पोखरेल सहित प्रमुख प्रशासकीय अधिकृत नारायण न्यौपाने, विभिन्न शाखा अधिकृतहरु, वडाअध्यक्षहरू, कार्यपालिका सदस्य, वडासदस्यहरु साथै कर्मचारी र नगरप्रहरीको टोलीले आगजनी भएको भौतिक संरचनाको सरसफाई सहित पुनःनिर्माण, जलेका कागजात, फर्निचरका टुक्रा र मसिनो धुलो हटाउँदै वातावरण सफा गर्ने कार्यमा जुटिरहेका छन् । सरसफाई कार्यमा अन्य कर्मचारीसँगै अग्र पंक्तिमा देखिएका कनकाई नगरपालिकाका प्रमुख प्रशासकीय अधिकृत न्यौपानेले जनताका लागि सेवा प्रवाह चाँडै संचालनमा ल्याइने आश्वासन दिए ।
जनप्रतिनिधि र पालिकाका कर्मचारीहरु सरसफाई कार्यमा आँफै खटेको देखेर एक स्थानीयबासीले भने, “दशैंको बेला यस्तो विपत्ति देख्दा मन दुख्यो, तर जनप्रतिनिधि र जिम्मेवार कर्मचारीहरु आफैं मैदानमा देख्दा आशा पलायो।”
कनकाई नगरपालिकाका प्रमुख प्रशासकीय अधिकृत नारायण न्यौपानेले नगरपालिकाले जतिसक्दो चाँडो पालिकाको सेवा सुचारु गर्ने योजना रहेको बताए । साथै थप पुनःनिर्माणकालागि माथिल्लो निकायमा समन्वय गरिने समेत जानकारी दिए ।
