फाइल फोटोः संविधान जारी गर्दै तत्कालीन राष्ट्रपति डा. रामवरण यादव र सभामुख स्वर्गीय सुवास नेम्वाङ।
काठमाडौं \ आज संविधान दिवस तथा राष्ट्रिय दिवस, २०८२ का अवसरमा राष्ट्रपति रामचन्द्र पौडेलले शुभकामना सन्देश जारी गरेका छन् ।
यस वर्ष वर्तमान विशेष राजनीतिक परिस्थितिका कारण दिवसका अवसरमा झाँकीलगायत कार्यक्रम भने स्थगन भएको जनाइएको छ ।संविधान दिवसका अवसरमा आज राष्ट्रपति रामचन्द्र पौडेलको प्रमुख आतिथ्यतामा बिहान ८ः३० बजे सैनिक मञ्च, टुँडिखेलमा दिवसको मूल कार्यक्रम आयोजना तय भएको बताइएको छ ।
नेपाली जनताको बलिदानीपूर्ण र लामो संघर्षको उपलब्धिस्वरुप संविधानसभाबाट नेपालको संविधान २०७२ असोज ३ गते घोषणा भएको थियो । मुलुकमा भएको दोस्रो संविधानसभाको निर्वाचनपछि गठित संविधानसभाले अथक मेहेनत र लामो विवादपछि ‘नेपालको संविधान, २०७२’ जारी गरेको थियो ।
विसं २०७२ असोज ३ गते राति नयाँ बानेश्वरस्थित तत्कालीन संविधानसभा बैठकस्थल अन्तर्राष्ट्रिय सम्मेलन केन्द्रबाट तत्कालीन राष्ट्रपति डा. रामवरण यादवले यो संविधानलाई जारी भएको घोषणा गरेका थिए ।
