कनकाई खबर \ झापाको बिर्तामोडस्थित मुक्ति चोकमा राष्ट्र र संविधान रक्षाको लागि शान्तीपूर्ण मौन प्रदर्शन गरिएको छ ।
नेपाल पत्रकार महासंघ झापाको आयोजनामा शान्ति र लोकतन्त्रका लागि पेशागत सञ्जाल (पापड) र स्वच्छ छविका नागरिक अगुवाहरूले शान्तिपूर्ण (मौन) विरोध प्रदर्शन गरेका हुन् ।
महासंघको देशव्यापी भएको कार्यक्रम अन्तरगत शुक्रबार बिर्तामोडको मुक्ति चोकबाट शान्तिपूर्ण र्याली सहितको मौन विरोध प्रदर्शन गरिएको हो । नेपाल पत्रकार महासंघ झापाका अध्यक्ष एकराज गिरीको नेतृत्वमा विभिन्न संघ संस्थाका प्रतिनिधि, झापाली अग्रज पत्रकारहरु लगायतको उपस्थितिमा शान्ति र लोकतन्त्रको लागि सेभ द नेशन, सेभ द कन्स्टिच्यूसन लेखिएको प्लेकार्ड बोकेर मौन र्याली निकालिएको थियो ।
मुक्ति चोकबाट अधुवा खोलाको पुल हुँदै पुनः मुक्ति चोकमा पुगेर शान्तिपूर्ण मौन बिरोध जनाउँदै र्याली समापन भएको थियो ।
नेपाली जनताको त्याग र बलिदानले आर्जित नेपालको संविधान तथा लोकतान्त्रिक शासन प्रणाली विरुद्ध हुने हरेक गतिविधिको प्रतिकार गर्न पत्रकारहरू सधैं एकताका साथ अघि बढ्नु पर्ने भन्दै सांकेतिक रुपमा मौन र्याली निकोलेको जनाइएको छ ।
कार्यक्रममा नेपाल पत्रकार महासंघ झापा शाखाका अध्यक्ष एकराज गिरीको नेतृत्वमा झापाली पत्रकारहरुको बाक्लो उपस्थिती रहेको थियो भने नेपाल बार एसोसिएशन झापा शाखाका तर्फबाट अधिबक्ता हेमकला कट्टेल, चित्रा मगर सहित अन्य प्रतिनिधिहरु, नागरिक प्रहरी बलका प्रतिनिधिहरूको समेत उपस्थिति रहेको महासंघ झापाका उपाध्यक्ष सुव्रत न्यौपानेले जानकारी दिए ।
