काठमाडाैं \ पूर्वप्रधानन्यायाधीश सुशीला कार्कीलाई अन्तरिम सरकार प्रमुख बनाउने सहमति जुटेको छ । शुक्रबार दिनभर भएको छलफलपछि प्रतिनिधि सभा र प्रदेश सभा विघटन गर्ने निर्णयसमेत भएको छ ।
राष्ट्रपति रामचन्द्र पौडेल सुरुमा कार्कीलाई सरकारको नेतृत्व सुम्पिएपछि मात्रै संसद् विघटन गर्ने अडानमा थिए, तर अन्ततः दुवै विषयमा सहमति बनेको हो ।
अहिले शीतलनिवासमा संसद् विघटन र कार्कीलाई प्रधानमन्त्री नियुक्त गर्ने नियुक्तिपत्रको मस्यौदा तयार भइरहेको छ । सहमति अनुसार राष्ट्रपति पौडेलले आज राति ९ बजे कार्कीलाई शपथ गराउने तयारी गरेका छन् ।
यसअघि नयाँ सरकार गठनबारे छलफल गर्न कार्की, सुदन गुरुङ र अधिवक्ता ओम प्रकाश अर्याल शीतलनिवास पुगेका थिए । प्रारम्भमा संसद् विघटनबारे मतभेद भए पनि अन्ततः सहमति जुटेपछि कार्कीलाई अन्तरिम सरकार प्रमुख बनाउने निर्णय भएको हो ।
प्रधानमन्त्री केपी शर्मा ओलीले भदौ २३ गते जेनजी आन्दोलनको दबाबपछि राजीनामा दिएका थिए । राजीनामा सोही दिन राष्ट्रपति पौडेलले स्वीकृत गरेका थिए ।
