कनकाई खबर \ देशव्यापी भ्रष्टाचारविरुद्धको अभियान अन्तर्गत जेनजी पुस्ताको नाममा मंगलबार सञ्चालन भएको प्रदर्शनबाट सार्वजनिक भौतिक संरचना सहित निजी सम्पत्तिमा समेत भएको आक्रमणसँगै उत्पन्न परिस्थितीका कारण यतिबेला देशमा अन्यौल छाएको छ ।
जनमानसमा छाएको अन्यौलसँगै भएका त्रासदीपूर्ण घटनाले स्थानीय तहमा गम्भीर तनाव सिर्जना गरेको छ । कनकाई नगरपालिकाका मेयर राजेन्द्रकुमार पोखरेलले आफ्नो भर्खरै निर्माण सम्पन्न भएको नयाँ घर र आँफू बस्दै आएको भाइ दिनेश पोखरेलको घरमा आगजनी गरी खरानी बनाइएको घटनाप्रति दुःख व्यक्त गरेका छन् ।
मेयर पोखरेलले आफुसँगै भएकी ९० वर्षीया आमाको पीडादायक अवस्था उल्लेख गर्दै भावुक अभिव्यक्ति दिएका छन्। “आमाको स्वास्थ्य अवस्था अत्यन्तै नाजुक छ। यस्तो अमानवीय कार्यले हाम्रो परिवारमा मानसिक र शारीरिक पीडा थपिएको छ,” उनले भने ।
सामाजिक सञ्जाल तथा केही संचार माध्यममा मेयर पोखरेलको घरबाट ८० केजी सुन बरामद भएको भन्ने दाबीप्रति उनले पुनः खण्डन गर्दै प्रश्न उठाएका छन् — “यदि यस्तो सत्य हो भने, प्रमाण के छ ? कसले बरामद गर्यो ? कसरी ८० केजी सुन भएको पुष्टि भयो ?” मेयर पोखरेलले ती आरोपलाई “भ्रामक, तथ्यहीन र चरित्र हत्या प्रयास” भन्दै खण्डन गरेका छन् ।
मेयर पोखरेलले केही युट्युबरलाई लक्षित गर्दै प्रमाणसहित सत्य तथ्य सार्वजनिक गर्न आग्रह गर्नुका साथै भ्रामक प्रचारविरुद्ध कानुनी कारबाहीको चेतावनी समेत दिए । उनले आफ्नो सम्पूर्ण सेवा सुविधा जनताको सेवामा समर्पित गर्दै अहोरात्र जनहितमा क्रियाशील रहेको उल्लेख गर्दै आफू विरुद्ध लागेका केही व्यक्तिहरुले बदनाम गर्ने प्रयास गरेकोमा दुःख व्यक्त गरे ।
“म मेयर हुनु अघि र अहिलेको सम्पत्ति विवरण छानबिन गर्न तयार छु। जोसुकैले चाहे पनि, म सार्वजनिक रूपमा चुनौती दिन्छु,” मेयर पोखरेलले स्पष्ट पारे ।
नगरपालिकाले घटनाको छानबिनका लागि सम्बन्धित निकायसँग समन्वय गरिरहेको जानकारी दिँदै, मेयर पोखरेलले जनतालाई अफवाहमा नपर्न र संयमित रहन आग्रह गर्दै समय आएपछि सबै कुराको लेखाजोखा हुने प्रष्ट पारे ।
प्रदर्शनकारीले आगो लगाएर कनकाई नगरपालिकाको कार्यालय सबै ध्वस्त बनाएका छन् भने नगर क्षेत्रका सबै वडा कार्यालयमा समेत आगजनी गरेर नष्ट गरेको बताइएको छ । त्यस्तै कनकाई नगरपालिकाकी उपप्रमुख आशा शिवाकोटीको समेत निवासमा प्रदर्शनकारीहरु प्रवेश गरी महत्वपूर्ण सामाग्री साथै कागजातहरु बाहिर ल्याएर जलाएका छन् ।
प्रदर्शनकारीले कनकाई वडा नं.३ , वडा नं.७ का वडाअध्यक्ष क्रमशः युवराज चम्लागार्इँ र भिष्म सिटौलाको निजी घरमा आगजनी गरेका छन् भने मुख्य राजनीतिक दलहरुका नगरस्तरीय पार्टी कार्यालयको कागजातहरु जलाएर नष्ट गरेको बताइएको छ । त्यस्तै नेपाली कांग्रेस झापा जिल्ला सभापति देउमान थेवेको सुरुङ्गास्थित निवास, सामाजिक व्यक्तित्व लीलाप्रसाद चिमरीया र रविन्द्र लम्साल समेतको निजी निवासमा प्रदर्शनकारीले आगजनी गरेको बताइएको छ ।