कनकाई खबर \ झापाको सुरुङ्गामा एक भव्य समारोहका बीच कनकाई प्रतिभा प्रतिष्ठानले अग्रज साहित्यकार कोमलप्रसाद पोखरेलको आठौं कृति लोकार्पण गर्नुका साथै पोखरेललाई सम्मान गरेको छ ।
“स्तुत्यनुवाद पञ्चदशी भक्तिकाव्य” को प्रकाशक समेत रहेको कनकाई प्रतिभा प्रतिष्ठानले मोतीजयन्तीको १६० औं अवसर पारेर शनिवार कनकाई ३ सुरुङ्गास्थित होटल डिलाइटको सभाहलमा एक भव्य समारोहका बीच कृति लोकार्पणसँगै अग्रज साहित्यकार एवं कृतिकार पोखरेललाई सम्मान गरेको हो ।
सम्मानित व्यक्तित्व पोखरेललाई कार्यक्रमका प्रमुख अतिथी कनकाई नगर प्रमुख राजेन्द्रकुमार पोखरेल , विशिष्ट अतिथीहरु व्यासाचार्य किशोरकुमार गौतम , आचार्य पण्डित छन्दुराम भण्डारी , पत्रकार चन्द्र भण्डारी , कार्यक्रमका अध्यक्ष जीवनाथ सुवेदी लगायतले सम्मान पत्र, दोसल्ला साथै खादामालाबाट सम्मान गरेका थिए ।
सम्मानित व्यक्तित्व पोखरेललाई प्रदान गरिएको सम्मान पत्रमा छन्दबद्ध श्लोकबाट पोखरेलको परिचय साथै कर्म प्रस्तुत गरिएको थियोे । सम्मानपत्रमा उल्लेखित छन्दोवद्ध श्लोक प्रतिष्ठानका सदस्य निर्मलकुमार खतिवडाले वाचन गरेका थिए । प्रतिष्ठानका सह–सचिव विष्णुकुमार कोईरालाले कार्यक्रममा पोखरेलको विस्तृत रुपमा परिचय गराएका थिए ।
पोखरेलको सम्मानसँगै कार्यक्रमका प्रमुख अतिथी नगर प्रमुख पोखरेल सहित विशिष्ट व्यक्तित्वहरुबाट संयुक्तरूपमा पोखरेलको आठांै कृति “स्तुत्यनुवाद पञ्चदशी भक्तिकाव्य” लोकार्पण भएको बताइएको छ ।
कृतिकार पोखरेलका यस अघि “मेरो सुर्य” शोक कविता संग्रह , “हाउडी पुराण” हास्यव्यङ्ग्य निबन्धसङ्ग्रह , “अन्तव्र्यथा ः आजको” कथासंग्रह , “मेरो अमेरिका यात्रा” यात्रा निबन्धसंग्रह, “धर्मा” शोकमहाकाव्य, “सजिलो कोमल गीता” श्रीमद्भागवत गीताको श्लोकानुवाद , “म फर्केर आएँ” हास्यव्यङ्ग्य कविता संग्रह गरी सातओटा कृति प्रकाशन भई सकेका छन भने “स्तुत्यनुवाद पञ्चदशी भक्तिकाव्य” पोखरेलको आठौं कृतिको रुपमा प्रकाशन भएको हो । समालोचक एवं अग्रज साहित्यकार पोखरेलका थप केहि प्रकाशोन्मुख कृतिहरु समेत रहेका छन ।
पोखरेलको कृति “स्तुत्यनुवाद पञ्चदशी भक्तिकाव्य” को सविस्तार समिक्षा समिक्षक साङ्गवेद संस्कृत विद्यालयका सहायक प्रधानाध्यापक पण्डित सोमनाथ गौतमले गरेका थिए । कृति चुनौतिपुर्ण र जीवनभरको प्राज्ञिकता खनिएको समिक्षक गौतमले वताए ।
कार्यक्रमलाई सम्बोधन गर्दै प्रमुख अतिथी नगर प्रमुख पोखरेलले सम्मानित व्यक्तित्व नगरकै अभिभावक भएको बताउँदै थप सक्रिय एवं सुस्वास्थ्य र दिर्घायुको कामना गरे । पोखरेलले कनकाई प्रतिभा प्रतिष्ठानले गर्दै आएका कार्यहरुको प्रशंसा गर्दै यस किसिमका कार्यक्रमहरुमा नगर सदैव साथमा रहने प्रतिवद्धता समेत व्यक्त गरे ।
प्रतिष्ठानका अध्यक्ष शिक्षासेवी एवं साहित्यकार जीवनाथ सुवेदीको अध्यक्षतामा सम्पन्न कार्यक्रममा शुभकामना मन्तव्य राख्दै विशिष्ट अतिथीहरु व्यासाचार्य किशोर कुमार गौतम , प्राध्यापक डाक्टर गंगाप्रसाद अधिकारी, पण्डित छन्दुराम भण्डारी , प्राज्ञ सुमित्रा वाङ्देल चेली , पत्रकार चन्द्र भण्डारी , रुद्र गौरी श्री अम्बिका ओली प्रतिष्ठानका अध्यक्ष गंगाप्रसाद ओली लगायतले कनकाई प्रतिभा प्रतिष्ठानले राष्ट्रिय स्तरको कार्यक्रम भव्य रुपमा सम्पन्न गरेर अग्रज साहित्यकार कोमलप्रसाद पोखरेलको कृति प्रकाशन ,विमोचन गर्नुका साथै साहित्यकार पोखरेललाई सम्मान समेत गरेकोमा प्रतिष्ठानप्रति आभार प्रकट गरे ।
ईलाम सहित झापाका विभिन्न क्षेत्रबाट सयौंको संख्यामा साहित्यअनुरागीहरुको सहभागिता रहेको कार्यक्रममा उपस्थित सबैलाई स्वागत प्रतिष्ठानका सचिव प्रेम प्रभात न्यौपानले र कार्यक्रम संचालन प्रतिष्ठानका उपाध्यक्ष डाक्टर पुण्यप्रसाद पौडेलले गरेका थिए ।
