कनकाई खबर \ सहारा नेपाल बचत तथा ऋण सहकारी संस्था लिमिटेड सेवा केन्द्र सुरुङ्गाले ऋणी सदस्य लगनबत्ती चौधरीको असामयिक निधनपछि कर्जा सुरक्षण कार्यक्रम अन्तर्गत परिवारलाई आर्थिक सहयोग गरेको छ ।
कनकाई –४ निवासी चौधरीको निधनपछि सहकारीबाट लिएको ऋण तिर्न समस्या भइरहेको अवस्थामा संस्थाको तर्फबाट उनले लिएको ऋण मिनाहा गर्दै रु. ५ लाख र काजकिरिया बापतको आर्थिक सहयोग रु. २५ हजार गरी जम्मा रु.५ लाख २५ हजार छोरी छत्रिका चौधरीलाई सोमबार एक संक्षिप्त कार्यक्रमका बीच हस्तान्तरण गरिएको हो ।
सेवा केन्द्र सञ्चालन उपसमिति संयोजक निर्मल दाहालको अध्यक्षतामा सम्पन्न संक्षिप्त कार्यक्रममा सदस्य राम भुजेल, चन्द्रा सिटौला, सेवा केन्द्र प्रमुख टिकाबहादुर प्रधान लगायतको उपस्थिति थियो । सेवा केन्द्रका कर्मचारी रेवत ओझाले सञ्चालन गरेको औपचारिक कार्यक्रममा संयोजक दाहालले सहकारी संस्थाले सदस्यहरूको सुरक्षालाई ध्यानमा राख्दै ल्याएको कर्जा सुरक्षण कार्यक्रमबारे जानकारी गराउँदै चेक हस्तान्तरण गरेका थिए ।
चेक हस्तान्तरणको क्रममा लगनबत्ती चौधरीकी छोरी छत्रिका चौधरी भावुक हुँदै आमाको उपचारका लागि लिएको ऋण तिर्न नसक्ने अवस्था आएको बताउँदै संस्थाले दिएको सहयोगप्रति आभार व्यक्त गरिन् । उनले भनिन्, “आमाको उपचारमा धेरै खर्च भयो, ऋण तिर्ने अवस्था थिएन । आज संस्थाले जुन सहयोग ग¥यो, त्यसले हाम्रो पीडामा केही राहत दिएको छ।”
स्थानीय समुदायमा सहारा साकोसको यो कदमको प्रशंसा भइरहेको छ । संस्थाले विगतदेखि नै सदस्यहरूको सामाजिक सुरक्षालाई प्राथमिकता दिँदै आएको छ । कर्जा सुरक्षण कार्यक्रम अन्तर्गत सदस्यको मृत्यु भएमा बाँकी ऋण मिनाहा गरिने र परिवारलाई काजकिरिया खर्च उपलब्ध गराउने व्यवस्था रहेको सुरुङ्गा सेवा केन्द्रका प्रमुख टिकाबहादुर प्रधानले जानकारी दिए ।
यस किसिमको कार्यले सहकारी संस्थाहरूले आपतकालीन अवस्थामा सदस्य परिवारको साथ कसरी दिन सक्छन् भन्ने उदाहरण प्रस्तुत गरेको बताइएको छ ।
