कनकाई खबर \ पुर्वकै प्रसिद्ध धार्मिक तथा पर्यटकीय क्षेत्र दोमुखामा आज भइरहेको निर्वाचनमा मतदाताको उत्साहजनक सहभागिता रहेको पाइन्छ ।
अहिले दिउँसो ३ बजे सम्ममा ८ सय ५० मतदाताले मतदान गरेको निर्वाचन समितिले जनाएको छ । आगामी तीन वर्षे कार्यकालका लागि नयाँ नेतृत्व चयन गर्न आज शनिवार भइरहेको निर्वाचनले स्थानीय स्तरमा संसदीय निर्वाचनको झल्को दिएको महसुश गरिएको छ ।
संस्थामा मतदाताको रुपमा आजीवन सदस्य १ हजार २८० र ५५ साधारण सदस्य गरी १ हजार ३३५ मतदाता रहेको निर्वाचन आयुक्त लीलाप्रसाद भट्टराईले जानकारी दिए । मतदानको निर्धारित समय आज बिहान ७ बजेको समयमा वर्षातको समेत पर्वाह नगरी मतदाताको उत्साहजनक सहभागीता रहेको स्थानीय अरुण नेपालले कनकाई खबरलाई जानकारी दिए ।
धार्मिक तथा पर्यटकीय क्षेत्रको नेतृत्व चयनका लागि हुने यो निर्वाचन भने निकै रोचक हुने भएको छ । निर्वाचनमा दुईवटा मुख्य राजनीतिक दल एमाले र काँग्रेसले अलग अलग प्यानल बनाएर निर्वाचनमा होमिएका छन् भने दललाई काउन्टर दिन स्वतन्त्र तर्फका उम्मेद्वार समेत चुनावी मैदानमा प्रतिस्पर्धामा छन् ।
निर्वाचनमा मनबहादुर मगर (मणि) , मोहनबहादुर कार्की र किरण ओलीले नेतृत्व गरेको प्यानल बीच त्रिपक्षीय प्रतिस्पर्धा हुने भएको छ ।
अध्यक्षका उम्मेद्वार मगरले प्रगतिशील प्यानलको नेतृत्व गरेका छन् भने कार्कीले लोकतान्त्रिक प्यानलको, त्यस्तै ओलीले स्वतन्त्र प्यानल खडा गरी निर्वाचनमा होमिएका छन् । राजनीतिक दलहरु अग्रभागमा नदेखिए तापनि उम्मेद्वारहरु दलकै समर्थनमा उठेको बताइएको छ ।
संस्थामा अध्यक्ष १, प्रथम उपाध्यक्ष १, द्वितीय उपाध्यक्ष १, सचिव १, सह सचिव १, कोषाध्यक्ष १, महिला आरक्षण सदस्य ४ र खुल्ला सदस्य ५ रहने व्यवस्था रहेको छ ।
निर्वाचन आयुक्तका रुपमा लीलाप्रसाद भट्टराई, सचिवमा नरबहादुर थपलिया र सदस्य संगीता कोइराला सुवेदी रहेका छन् । मतदान स्थलमा सुरक्षा व्यवस्था मजवुत बनाइएको निर्वाचन समितिले जनाएको छ । साँझ ५ बजे सम्मलाई मतदानको समय तोकिएको साथै आवश्यक तयारी पूरा गरेर बेलुका ८ बजेबाट मतगणना सुरु गर्ने तयारी गरिएको निर्वाचन समितिका सचिव नरबहादुर थपलियाले कनकाई खबरलाई जानकारी दिए ।