कनकाई खबर \ झापाको कनकाई नगर क्षेत्रको सामाजिक गतिविधिमा क्रियाशिल बंगाली समाज सेवा समितिले अघिल्ला वर्षहरु झैं यस वर्षपनि मनसादेवीको पूजाअर्चना सहित विविध साँस्कृतिक कार्यक्रम संचालन गर्ने भएको छ ।
कार्यक्रमलाई थप व्यवस्थित बनाउँदै समितिले भदौ महिनाको चतुर्थी, पञ्चमी र षष्ठी तिथिमा मनाइने यो पर्वलाई बंगाली समुदायले विशेष महत्वको पर्वका रुपमा लिने गरेको बंगाली समाज सेवा समिति कनकाईका अध्यक्ष पंकज मण्डल बताउँछन् ।
सोही अवसरमा कलश यात्रा सहित सुरुङ्गा बजार परिक्रमा गरी कनकाई माई नदीमा पुगेर ल्याएको शुद्ध जल कनकाई ३ सुरुङ्गास्थित कालिस्थान टोलमा तयार गरिएको मनसादेवीको मन्दिरमा अर्पण गर्ने कार्यक्रम रहेको संस्थाका अध्यक्ष मण्डलले जानकारी दिए ।
कार्यक्रममा मनसा देवीको पुजा आरधनासँगै कालिस्थान टोलमा हुने धार्मिक अनुष्ठान सहितको माँ मनसा देवीको पूजा अर्चनामा अन्य जिल्लाबाट समेत बंगाली समाज र अन्य समुदायका भक्तजनहरुको ठुलो सङख्यामा सहभागीता हुने विश्वास गरिएको छ । पूजामा जप ,धार्मिक गतिविधि, साँस्कृतिक कार्यक्रम सहित धार्मिक झाँकी, रात्रीकालिन भजन र विविध शिव ताण्डप नृत्य लगायतका साँस्कृतिक प्रस्तुती तयार गरेको पुजा समितिका संयोजक अमित मण्डलले जानकारी दिए ।
यस क्षेत्रमा विगत लामो समयदेखी बसोबास गर्दै आएका बंगाली समाजले आफ्नो संस्कार साथै संस्कृतिको संरक्षणमा देखाएको सक्रियताले अन्य समुदायलाई समेत प्रेरणा जगाएको बंगाली समुदायका अग्रज एवं समितिका सल्लाहकार पवनकुमार मण्डल बताउँछन् । बंगाली समुदायले भदौ महिनाको पहिलो पञ्चमी तिथिलाई विशेष पर्वका रुपमा मनाउँछन् । यो समुदायको परम्परा अनुसार चतुर्थी तिथिदेखि षष्ठी तिथिसम्म तीन दिनलाई विशेष पूजाअर्चनाका साथ मनाउँदै आएका छन् । माता मनसा देवीको विशेष पूजाअर्चना गरी यो पर्व मनाउने गरिएको संस्थाका उपाध्यक्ष विगम मण्डलको बुझाई छ ।
मनसा देवीको पूजाअर्चनाबाट दुःख, कष्ट सबै नाश भएर जाने र मानिसका सबै मनोकामना पूर्ण हुने विश्वास गरिएको छ । भदौ महिनाको पहिलो पञ्चमीका दिन हुने मनसा देवीको यो विशेष पूजाअर्चनाकालागि एक दिन अघि चतुर्थीका दिनदेखि नै व्रत बस्ने चलन रहेको बताइएको छ ।
यो पर्वमा बंगाली समुदायका महिला मात्र होइन पुरुषहरूले समेत व्रत बस्ने र मनसा देवीको विशेष पूजाअर्चना गरी रातभर जाग्राम बस्ने चलन रहेको बंगाली समुदायका अगुवाहरु बताउँछन् । दिनभर ब्रत बसेका ब्रतालुहरूले चामलको पिठोबाट घिउमा पकाइएको विशेष परिकार (घाटरा पिठा) साथै फलफूलहरू प्रसादको रुपमा खाने चलन रहेको बताइएको छ ।
षष्ठिका दिन बिहान बलीपूजा गरेर चेलीबेटी, भान्जाभान्जी, आफन्त, साथीभाइलाई बोलाएर प्रसाद खुवाउने परम्परा रहेको सेवा समिति कनकाईका सचिव रविन मण्डलको भनाई छ । सोहीदिन बेलुका मनसा देवीको मूर्ति नदीमा लगेर विसर्जन गरेपछि यो पर्व समाप्त हुने आयोजक समितिका सचिव मण्डलले जानकारी दिए ।