कनकाई खबर \ नेपाल कलवार सेवा समिति झापाले हरितालिका तीज पर्व तथा मंगल चौथी व्रतको अवसरमा भेटघाट तथा वृहत सांस्कृतिक कार्यक्रम सम्पन्न गरेको छ ।
समितिका झापा अध्यक्ष समाजसेवी राजकिशोर चौधरीको अध्यक्षता एवं अधिवक्ता डाक्टर कस्तुरी जायसवालको प्रमुख आतिथ्य रहेको महान पर्व तीज विशेष कार्यक्रम पाथीभरा सिने प्लाजा बिर्तामोडमा सम्पन्न भएको हो । कार्यक्रममा विभिन्न सांस्कृतिक प्रस्तुतिहरूले सहभागीहरूलाई थप मनोरञ्जन प्रदान गरेको कार्यक्रम संयोजक हेमलता चौधरीले जानकारी दिएकी छन् ।
कार्यक्रमलाई सम्बोधन गर्दै प्रमुख अतिथी अधिवक्ता जायसवालले महिला भनेको एउटा शक्ति भएका कारण परिवारमा एकआपसमा सहकार्य गरेर अघि बढ्नुु पर्नेमा जोड दिएकी छन् । शक्ति भएकै कारण कुनै पनि महिलाले घर भित्र साथै बाहिरको सामाजिक परिवेशमा समेत सक्रियता देखाउँनु पर्ने भन्दै प्रमुख अतिथी जायसवालले जातिय एकता र सामाजिक कार्यमा हामी सबैले हातेमालो गर्दै एकताबद्ध भएर जानुपर्छ भन्ने कुरामा जोड दिइन् ।
समाज रुपान्तरणका लागि महिलाहरु पनि सधैं सक्रियताका साथ अघि बढ्नु पर्ने तर्फ जोड दिँदै प्रमुख अतिथीले कार्यक्रममा कलवार समुदायका महिलाहरुको अत्यन्तै राम्रो उपस्थिती भएको भन्दै खुशी व्यक्त गरिन् । रातो पहिरनमा सजिएका कलवार समुदायका महिलाहरुले तीजको गीतमा नाच्दै एकआपसमा खुशी साँटेका थिए ।
संस्थाका अध्यक्ष राजकिशोर चौधरीले महिलाहरुको महान पर्व तीज विशेष कार्यक्रममा उत्साहका साथ उपस्थित भएका सबै आमा, दिदी, बहिनीहरुलाई शुभकामना व्यक्त गरे । महिलाहरुको हितका लागि संस्थाको तर्फबाट सक्दो सहयोग गर्ने प्रतिवद्धता जनाउँदै अध्यक्ष चौधरीले तीज पर्वको अवसरमा दिदीबहिनीहरु वीचमा शुभकामना आदानप्रदानसहित दर खुवाउने विशेष कार्यक्रम समेत रहेको जानकारी दिए ।
तीज विषेश जातिय परम्परागत सांस्कृतिक नृत्य प्रस्तुत गर्दै दर खाएर मनोरञ्जन गरिएको थियोे । दरको व्यवस्थापन कलवार समाजका सत्यनारायण चौधरी र रामनारायण चौधरीले गरेको बताइएको छ । तीज विशेष कार्यक्रममा झापाका विभिन्न स्थान साथै मोरङ, सुनसरी र भारतको समेत विभिन्न ठाउँबाट कलवार समुदायका विशिष्ट व्यक्तित्वहरु समितिका सल्लाहकार लगायतको आतिथ्य रहेको थियो । त्यस्तै संस्थाका सम्पुर्ण पदाधिकारी, सदस्यहरु सहित कलवार समुदायका बुबाआमा सहित चेलीमाइतीहरुको बाक्लो उपस्थिती रहेको बताइएको छ ।
संस्थाका उपाध्यक्ष मनोजकुमार चौधरी (रामजानकी) ले शव्दद्वारा प्रमुख अतिथी सहित अतिथीहरुलाई स्वागत गर्दै सामाजिक क्षेत्रमा संस्थाको भुमिका र वर्तमान अवस्थाको बारेमा प्रष्ट पारेका थिए । सचिव सञ्जय चौधरी र मीनाकुमारी दासले संचालन गरेको औपचारिक सहित साँस्कृतिक विशेष कार्यक्रममा विशिष्ट अतिथिका रुपमा संजीवकुमार शाह, एपोलो भगत, रमेश भगत, ओम भगत, अर्जुन जायसवाल, रामाशिष चौधरी, पवन चौधरी, अशोक चौधरी लगायत विभिन्न स्थानबाट समुदायका अग्रज महानुभावहरुको आतिथ्य रहेको थियो ।
