कनकाई खबर \ महिला सशक्तिकरण, सांस्कृतिक संरक्षण र सामाजिक एकताको सन्देशसहित रोटरी क्लब अफ सुरुङ्गाको तीज मिलन कार्यक्रम भव्य रुपमा सम्पन्न भएको छ ।
कनकाई ७, दुर्गापुरस्थित वृक्ष क्याफेमा सम्पन्न कार्यक्रममा क्लबका पदाधिकारी, सदस्यहरू सहित रोटरियन परिवारका सदस्यहरूको सक्रिय सहभागिता रहेको थियो । तीजको अवसरमा महिलाहरूले परम्परागत पहिरनमा सजिएर तीजका गीतमा नाचगान गर्दै आपसी मेलमिलाप र संस्कृतिप्रति सम्मान प्रकट गरे ।
क्लवका अध्यक्ष डिल्लीराम मैनालीको अध्यक्षतामा सम्पन्न औपचारिक विशेष कार्यक्रममा तीज पर्वको ऐतिहासिक र सांस्कृतिक महत्वबारे चर्चा गरियो । कार्यक्रम संयोजक रेणुका उप्रेतीले सहभागी सबैलाई स्वागत गर्दै तीज पर्वले महिलाहरूबीच आत्मबल, सामाजिक एकता र सांस्कृतिक पहिचानको भावना जागृत गराउने कुरामा जोड दिइन् । कार्यक्रम संयोजक उप्रेतीले तीज मिलन कार्यक्रमले महिला सशक्तिकरण र सांस्कृतिक संरक्षणमा योगदान पु¥याउने विश्वास व्यक्त गरिन् ।
रोटरी क्लब अफ सुरुङ्गाले सामाजिक उत्तरदायित्व अन्तर्गत यस्ता सांस्कृतिक कार्यक्रमहरूलाई निरन्तरता दिँदै समुदायमा सकारात्मक ऊर्जा फैलाउने उद्देश्य राखेको क्लवका अध्यक्ष डिल्लीराम मैनालीले बताए । अध्यक्ष मैनालीले तीज पर्वले महिलाहरूलाई आत्मबल प्रदान गर्नुका साथै समाजमा सकारात्मक परिवर्तन ल्याउने प्रेरणा जगाएको बताए ।
तीज मिलन विशेष कार्यक्रममा क्लवका पुर्व अध्यक्ष टिकाप्रसाद कट्टेलले तीज पर्व र महिलासम्बन्धी सामाजिक विषयमा विचार व्यक्त गर्दै भने, “तीज केवल पर्व मात्र होइन, यो महिलाहरूको आत्मबल, धैर्यता र सामाजिक चेतनाको प्रतीक हो। महिलाहरूको सहभागिता र नेतृत्व समाजको समृद्धिको आधार हो।” उनले तीजलाई महिला सशक्तिकरणको सन्देशवाहक पर्वका रूपमा व्याख्या गर्दै रोटरी क्लबले यस्ता कार्यक्रमहरूलाई निरन्तरता दिनु आवश्यक रहेको धारणा राखे ।
क्लवका सचिव रामप्रसाद निरौलाले संचालन गरेको औपचारिक कार्यक्रममा पुर्वअध्यक्षहरु कुमारमणि पोखरेल, शिवकुमार कडेल सहित क्लवका पदाधिकारी तथा सदस्यहरुको उपस्थिती रहेको थियो ।
