कनकाई खबर \ झापाको सुरुङ्गामा चेली–माइतीको सम्बन्धलाई थप प्रगाढ बनाउँदै व्यवसायी महिलाहरुको तीज मिलन कार्यक्रम भव्य रुपमा सम्पन्न भएको छ ।
कनकाई उद्योग वाणिज्य संघको आयोजना तथा कनकाई महिला उद्यमी व्यवसायीको सहआयोजनामा भव्य समारोहका बीच तीज मीलन कार्यक्रम सम्पन्न भएको हो ।
कार्यक्रममा स्थानीय महिला समूहहरूले प्रस्तुत गरेको तीजका पारम्परिक गीतमा नृत्य र संगिनी जस्ता सांस्कृतिक विधाहरूले कार्यक्रमलाई झनै रंगीन बनाएको थियो । कनकाई नगर क्षेत्रका विभिन्न वडाबाट उपस्थित भएका परम्परागत रातो साडी र चोलामा सजिएका महिलाहरुले तीजको रौनक थपेका थिए ।
तीज विशेष औपचारिक समारोहपछि तीजका गीतमा सामूहिक नृत्यसँगै सामुहिक रुपमा दर खाने कार्यक्रम सम्पन्न गरिएको थियो । जहाँ सहभागीहरूले तीजको परम्परागत परिकारको स्वाद लिएका थिए । दरको माध्यमबाट चेली–माइतीको सम्बन्धलाई अझ प्रगाढ बनाउने प्रयास गरिएको आयोजक समितिले जनाएको छ ।
संघका कार्यबाहक अध्यक्ष जनक कार्कीले तीज पर्वलाई महिला उद्यमशीलता र सामाजिक एकताको प्रतीकका रूपमा लिनुपर्नेमा जोड दिए । संघका कार्यबाहक अध्यक्ष कार्कीको अध्यक्षता तथा कनकाई नगरपालिकाकी उपप्रमुख आशा शिवाकोटीको प्रमुख आतिथ्यमा कार्यक्रम सम्पन्न भएको हो ।
कार्यक्रमलाई सम्बोधन गर्दै प्रमुख अतिथि शिवाकोटीले यस्ता पर्वहरूलाई केवल नाचगानको माध्यम मात्र नभई संस्कारसहितको समाज रूपान्तरणका लागि प्रेरणाको स्रोतका रूपमा लिनुपर्ने धारणा व्यक्त गरिन् । उपप्रमुख शिवाकोटीले महिलाहरूको सामाजिक, सांस्कृतिक र आर्थिक सशक्तिकरणमा यस्ता कार्यक्रमले महत्वपूर्ण भूमिका खेल्ने बताइन् ।
कार्यक्रम संयोजक अनिता मैनालीले स्वागत सहित औचित्यमाथि प्रकाश पारेको कार्यक्रममा युवा व्यवसायी राजु उप्रेती , कनकाई उद्यमी महिला व्यवसायी उपसमिति अध्यक्ष कविता बस्नेत, कनकाई उद्योग वाणिज्य संघका संस्थापक अध्यक्ष युवराज संग्रौला , कनकाई ३ का वडाअध्यक्ष युवराज चम्लागाईं लगायतले शुभकामना मन्तव्य राखेका थिए । संघको आफ्नै सभा हलमा सम्पन्न औपचारिक कार्यक्रमको संचालन संघका महासचिव सरोज सिटौलाले गरेका थिए ।
