कनकाई खबर \ झापाको कनकाई नगरपालिकाले सुरुङ्गा बजार क्षेत्रमा गरेको बजार अनुगमनले जनस्वास्थ्य र उपभोक्ता अधिकारको संरक्षणमा महत्वपूर्ण कदम चालेको छ ।
सुरुङ्गा बजार क्षेत्रको किराना पसल तर्फ खाद्य सामाग्रीको अनुगमनमा म्याद गुज्रिएका खाद्य सामग्री र यस अघि नै कनकाई नगरपालिकाबाट प्रतिबन्धित सुर्तिजन्य पदार्थहरू(गुटखा, चुरोट, खैनी, भोला, रजनिगन्धा आदि) ठूलो परिमाणमा बरामद भएको बताइएको छ ।
यस आर्थिक वर्षको पहिलो चरणमा सुरुङ्गा बजारतर्फ खाद्य सामाग्रीको व्यवसायमा मात्रै अनुगमन भएको बताइएको छ । सुरुङ्गा बजार क्षेत्रका साना–ठूला सबै किसिमका किराना पसलमा भएको अनुगमनका क्रममा केही पसलबाट बिस्कुट, चाउचाउ, ओट्स, विभिन्न किसिमका जुसका आइटम, खाने तेल, पानी पुरी, चिया मसला, मिट मसला, चाट मसला लगायत विभिन्न किसिमका म्याद गुज्रिएका, लेवल नभएका खाद्य सामाग्री नियन्त्रणमा लिएर नष्ट गरिएको टोली संयोजक कनकाई नगरपालिकाकी उपप्रमुख आशा शिवाकोटीले बताएकी छन् ।
अनुगमनका क्रममा कनकाई नगरपालिकाकी उपप्रमुख शिवाकोटीको नेतृत्वमा, प्रमुख प्रशासकिय अधिकृत नारायण न्यौपाने, कनकाई नगरपालिका कार्यापालिका सदस्य कृष्णमाया भुजेल, ईलाका प्रहरी कार्यालय सुरुङ्गाका प्रमुख सुवास ढुंगाना, कनकाई नगरप्रहरी प्रमुख ओमकुमार श्रेष्ठ, कनकाई उद्योग वाणिज्य संघका कार्यवाहक अध्यक्ष जनक कार्की, निवर्तमान अध्यक्ष त्रिलोचन चिमरीया,महासचिव सरोज सिटौला,.कनकाई नगरपालिका वन,वातावरण तथा विपत व्यवस्थापन शाखाका उमानाथ ढकाल, अनुगमन समितिका सदस्य सचिव एवं शाखा प्रमुख हरिप्रसाद पौडेल, कनकाई नगरपालिका कृषि शाखा प्राविधिक शित्तल अर्याल, पत्रकारहरु लीलाराज झापाली, रामप्रसाद निरौला ,चन्द्र बस्नेत लगायतको उपस्थिती रहेको थियो ।
आगामी दिनमा म्याद गुज्रिएका साथै कानुनले बन्देज गरेका कुनै पनि खाद्य सामाग्री विक्रि वितरण गरेको पाइएमा कानुन बमोजीम कार्वाही हुने भन्दै अनुगमन टोलीले त्यस्ता व्यवसायीलाई चेतावनी दिएको उपप्रमुख शिवाकोटीले कनकाई खबरलाई जानकारी दिएकी छन् । म्याद गुज्रिएका खाद्य सामाग्रीले उपभोक्ताको स्वास्थ्यमा गम्भीर असर पार्ने साथै सुर्तिजन्य पदार्थले दीर्घकालीन रोगको जोखिम बढाउँने भएकाले यस तर्फ आम उपभोक्ता आँफै सचेत हुनु पर्नेमा उपप्रमुख शिवाकोटीले जोड दिएकी छन् ।
अनुगमन टोली बजार प्रवेश गरेसँगै सुरुङ्गा बजार क्षेत्रका केही पसलहरु तत्काल बन्द भएका कारण आगामी दिनमा समेत बजार क्षेत्रमा अनुगमनलाई थप तिब्रता दिइने कनकाई नगरपालिकाका प्रमुख प्रशासकीय अधिकृत नारायण न्यौपानेले जानकारी दिए ।
व्यवसायीहरुले पालना गर्नु पर्ने विधि र प्रक्रिया पूरा गरी निर्धक्क भएर व्यवसाय संचालन गर्न प्रमुख प्रशासकीय अधिकृत न्यौपानेले आम व्यवसायीहरुलाई अनुरोध गरेका छन् ।अनुगमन टोलीबाट त्रसित बनेका व्यवसायीहरुलाई प्रमुख प्रशासकीय अधिकृत न्यौपानेले सहज वातावरणमा व्यवसाय संचालन गर्न अनुरोध गरे ।
अनुगमन सुरु भएपछि धेरै किराना पसलहरू सटर बन्द गरेर व्यापारी अन्यत्र गएका कारण बजारमा डर र सचेतना दुवै फैलिएको अनुमान गरिएको छ । बरामद सामाग्रीहरू कनकाई माई नदी किनारको कोटीहवन क्षेत्रमा अनुगमन टोलीसहित संचारकर्मी, नगर प्रहरी, उद्योग वाणिज्य संघको रोहबरमा जलाएर नष्ट गरेको बताइएको छ ।
चाडपर्व नजिकिँदै गर्दा बजारमा गुणस्तरीयता कायम राख्न अनुगमनको निरन्तरता आवश्यक छ भन्ने आवाज उठ्न थालेसँगै नगरपालिकाको ध्यानाकर्षण भएको जनाइएको छ । कनकाई नगरपालिकाको यो कदम केवल एक प्रशासनिक कार्य होइन, यो जनस्वास्थ्य र सुशासनको सन्देश पनि भएकाले बजार अनुगमनलाई नियमित र पारदर्शी बनाउँदै उपभोक्ताको अधिकार सुनिश्चित गर्नु आजको टड्कारो आवश्यकता रहेको पाइन्छ ।