कनकाई खबर \ नेपाल हर्ट फाउन्डेसनको आयोजनामा झापामा मुटुरोगका बरिष्ठ बिशेषज्ञसँग अन्तरक्रिया हुने भएको छ । जनस्वास्थ्यप्रति बढ्दो चासोलाई मध्यनजर गर्दै संचालन गर्न लागिएको यो अन्तरक्रिया स्वास्थ्य चेतना अभिवृद्धिको एक महत्वपूर्ण प्रयास मानिएको छ ।
नेपाल हर्ट फाउन्डेसन झापाको आयोजना तथा रोटरी एवं रोट्रयाक्ट क्लब बिर्तामोड साथै सुरुङगाको सहयोगमा मुटु रोगका बरिष्ठ बिशेषज्ञ प्रा.डा.राजेन्द्र कोजुसँग अन्तरक्रिया कार्यक्रमको आयोजना गरिएको हो । आगामी साउन १७ गते शनिबार चारपानेको सहारा साकोसको सभा हलमा कार्यक्रम संचालन हुने फाउन्डेसनका जिल्ला अध्यक्ष सन्तोष अग्रवालले जानकारी दिए ।
धुलिखेल अस्पतालका प्रतिष्ठित मुटु रोग विशेषज्ञ प्रा.डा.कोजूले मुटु रोगको पहिचान, रोकथाम र जीवनशैलीसँगको सम्बन्धबारे विस्तृत जानकारी दिने अध्यक्ष अग्रवालले बताए । जनचेतना अभिवृद्धि कार्यक्रमले आम नागरिकमा मुटु रोगको जोखिम तथा त्यसबाट बच्ने उपायबारे सचेतना फैलाउने विश्वास गरिएको छ ।
नेपाल हर्ट फाउन्डेशनको समर्पण विगत तीन दशकभन्दा बढी समयदेखि मुटु रोगबारे जनचेतना फैलाउँदै आएको संस्थाले झापामा यस किसिमको कार्यक्रम आयोजना गरेर स्थानीय समुदायलाई प्रत्यक्ष लाभ पु¥याउने लक्ष्य राखेको फाउन्डेशन झापाका निवर्तमान अध्यक्ष कुमारमणि पोखरेलले जानकारी दिए ।
नेपाल हर्ट फाउन्डेशनले झापा जिल्लामा मुटु स्वास्थ्यप्रति जनचेतना अभिवृद्धि गर्ने उद्देश्यले विभिन्न कार्यक्रमहरू सञ्चालन गर्दै आएको छ । यी कार्यक्रमहरूले स्थानीय समुदायमा मुटु रोगको जोखिमबारे जानकारी फैलाउने र समयमै उपचारको पहुँच सुनिश्चित गर्ने लक्ष्य राखेको निवर्तमान अध्यक्ष पोखरेल बताउँछन् ।
“स्वस्थ मुटु, दीर्घ जीवन” भन्ने नाराका साथ सञ्चालन हुने यो कार्यक्रमले मुटु रोगको जोखिम न्यूनीकरण र जीवनशैलीमा सुधार ल्याउने मार्गचित्र प्रस्तुत गर्ने अपेक्षा गरिएको छ ।
झापाको बिर्तामोडमा केही महिना अघि मात्र सम्पन्न फाउन्डेशनको ३३औं केन्द्रिय सभामा सम्मानित भइसकेका डा.कोजूले मानिसको जीवनशैली र मुटु रोगबारे प्रेरणादायी मन्तव्य दिएका थिए । वरिष्ठ मुटु रोग विशेषज्ञ डा.कोजुले आफ्नो चिकित्सा यात्राको अनुभव, भावनात्मक संघर्ष र समाजप्रति समर्पणलाई समेटेर लेखिएको पुस्तक ‘मुटुको कथा’ यस अघि नै सार्वजनिक भइसकेको छ । यो कृति केवल चिकित्सा विज्ञानको दस्तावेज मात्र नभएर, जीवनशैली सुधार, आत्मअनुशासन र मानवताप्रति समर्पणको कथा पनि भएको बताइएको छ ।
‘मुटुको कथा’ कृति पुस्तकमा डा. कोजुले आफ्नो ४० वर्षको चिकित्सा यात्राको अनुभवलाई ४१ शीर्षकहरूमा कथा, निबन्ध र संस्मरणको रूपमा प्रस्तुत गरेको पाइन्छ ।