कनकाई खबर \ श्रावण महिनाको सुरुवातसँगै रोटरी र रोट्रयाक्ट क्लब अफ सुरुङ्गाले मेहेन्दी फेलोसिप कार्यक्रम सम्पन्न गरेको छ ।
सांस्कृतिक एवं सामाजिक सद्भावको सन्देश दिन सक्ने यस किसिमको कार्यक्रममा स्थानीय महिला रोटरीयनहरूको उल्लेखनीय सहभागिता रहेको बताइएको छ । महिला रोटरीयनहरुले आयोजना गरेको मेहेन्दी फेलोसिप कार्यक्रम रोटरी क्लव अफ सुरुङ्गाकी कोषाध्यक्ष रेणुका मैनालीको अध्यक्षता एवं कनकाई नगरपालिकाकी उपप्रमुख आशा शिवाकोटीको प्रमुख आतिथ्यमा सम्पन्न भएको हो ।
कार्यक्रममा शुभकामना मन्तव्य राख्दै उपप्रमुख शिवाकोटीले मेहेन्दी कार्यक्रमलाई संस्कृति, महिला सशक्तिकरण र सामाजिक समावेशिता प्रवद्र्धन गर्ने सशक्त माध्यम भएको बताइन् । शुभकामना मन्तव्यका क्रममा उपप्रमुख शिवाकोटीले भनिन् ̶ “श्रावणको सुरुवातसँगै यस किसिमको सांस्कृतिक कार्यक्रमले हाम्रो पहिचानलाई जगेर्ना गर्नुका साथै महिलाहरूको नेतृत्वलाई सम्मानित गर्ने भएकाले रोटरी क्लबको यस्तो प्रयास प्रशंसनीय छ।”
मेहेन्दी फेलोसिप कार्यक्रमको प्रशंसा गर्दै उपप्रमुख शिवाकोटीले भविष्यमा पनि यस्ता सामाजिक एवं सांस्कृतिक गतिविधिहरूलाई निरन्तरता दिन आग्रह गरिन् । एकआपसमा मित्रता साथै सद्भावको वातावरण सृजना गर्ने यस्ता कार्यक्रमहरु संचालनमा सहयोग गर्न स्थानीय सरकार सधैं सकारात्मक रहेको भन्दै उपप्रमुख शिवाकोटीले आयोजकलाई थप उत्साह जगाएकी छन् ।
सोही अवसरमा विपन्न समुदायका मजदुर महिला माया बेस्रा र निर्मला भुजेलबाट प्रमुख अतिथी उपप्रमुख शिवाकोटीलाई मेहेन्दी लगाइदिएर कार्यक्रमको औपचारिक उद्घाटन भएको जनाइएको छ ।
रोटरी क्लव अफ सुरुङ्गाका अध्यक्ष डिल्लीराम मैनाली, पुर्वअध्यक्षहरु कुमारमणि पोखरेल, सुशिलकुमार श्रेष्ठ, खेम प्रसाईँ, शिवकुमार कडेल, उपाध्यक्ष ख्यामप्रसाद ओली, सचिव रामप्रसाद निरौला लगायत क्लवका अन्य पदाधिकारी तथा सदस्यहरुको उपस्थिती रहेको थियो । क्लवकी उपाध्यक्ष सरला दहाल पोखरेलले स्वागत गरेको औपचारिक कार्यक्रमको संचालन क्लवकी जोइन्ट सेक्रेटरी यदुका ओली उप्रेतीले गरेकी थिइन् ।
