कनकाई खबर \ झापाको कनकाई वडा नं. –३ को वडा कार्यालयले वडाबासीलाई विद्युतीय चुलो वितरण गरेको छ ।
वडा कार्यालय परिसरमा आयोजित एक संक्षिप्त कार्यक्रममा वडा कार्यालयले १३७ जनालाई विद्युतीय चुलो वितरण गरेको हो । कनकाई वडा नं.३ का वडाअध्यक्ष युवराज चम्लागाईँको अध्यक्षता एवं कनकाई नगरपालिकाका प्रमुख राजेन्द्रकुमार पोखरेलको प्रमुख आतिथ्य रहेको संक्षिप्त कार्यक्रममा नगर उपप्रमुख आशा शिवाकोटी, कार्यपालिका सदस्य कृष्णामाया भुजेल, वडा सदस्यहरु अनिल गोयल, गोविन्द सुवेदी सहित वडा अन्तर्गत विभिन्न टोलविकास समितिका संयोजक एवं सदस्यहरुको उपस्थिती रहेको थियो ।
विद्युतीय चुलोको प्रयोग र यसको प्रभावकारीताका विषयमा प्रकाश पार्दै कनकाई ३ का वडाअध्यक्ष चम्लागाईँले वडाबासीहरुको माग धेरै आएको भएपनि प्राथमिकताका आधारमा चुलो वितरण गरिएको बताए । यसपटक प्राथमिकतामा नपर्नेहरुलाई अर्को पटक अवसर प्रदान गरिने वडाअध्यक्ष चम्लागाईले जानकारी दिए । कुल ३ हजार ८७० पर्ने विद्युतीय चुलो प्राप्त गर्ने उपभोक्ताले अनुदानमा जम्मा रु.८ सय ८८ मात्र बुझाउनु पर्ने वडाअध्यक्ष चम्लागाईँले बताए ।
विद्युतीय चुलो वितरणका लागि बैकल्पीक उर्जा प्रवद्र्धन केन्द्रबाट ४७.९७ प्रतिशत, नगरपालिकाबाट १९.०९ प्रतिशत, संघबाट १०प्रतिशत र उपभोक्ताबाट २२.९४ प्रतिशत लागत साझेदारी रहेको बताइएको छ । सरकारले एलपी ग्यासको विकल्पमा स्वदेशमै उत्पादित विद्युतको खपत बढाउन विद्युतीय चुलो वितरण कार्यलाई प्राथमिकतामा राखेको नगर प्रमुख पोखरेलले जानकारी दिए ।
विद्युतीय चुलोबाट छिट्टै खाना पाक्ने भएकाले समयको बचत हुने, वातावरणको संरक्षणसँगै मानवीय स्वास्थ्यमा समेत सकारात्मक प्रभाव पर्ने भएकाले यसको प्रयोगले विशेष गरी गृहिणीलाई धेरै राहत मिल्न सक्ने विश्वास गरिएको छ ।विद्युतीय चुलो वितरण कार्यक्रमको सहजीकरण वडासचिव कमल भण्डारीले गरेका थिए ।
