बिर्तामोड \ झापाको विर्तामोडमा कोशी प्रदेशस्तरीय विज्ञान तथा प्रविधि प्रदर्शनी हुने भएको छ ।
बिर्तामोडस्थित देवी माध्यमिक विद्यालयमा आगामी जेठ २४ देखि २६ गतेसम्म संचालन हुने प्रदर्शनीमा कोशी प्रदेशका १२ वटा जिल्लाबाट एक लाखभन्दा बढी विद्यार्थीले अवलोकन गर्ने बताइएको छ ।
नेकपा (एमाले) विज्ञान तथा प्रविधि विभाग कोशी प्रदेशको आयोजनामा हुने उक्त प्रदर्शनीको तयारी अन्तिम चरणमा पुगेको आयोजक समितिले पत्रकार सम्मेलनमार्फत जानकारी गराएको छ । प्रदर्शनी स्थलमा हाल स्टल निर्माण कार्य तीव्र गतिमा भइरहेको छ । प्रदर्शनीमा १२५ वटा स्टलहरू रहनेछन्, जसमध्ये २० वटा व्यवसायिक (सशुल्क) स्टल हुने आयोजकले जानकारी दिएको छ । झापा जिल्लाका ३९६ माध्यमिक विद्यालयका विद्यार्थीहरूसहित कोशीभरिका विद्यार्थीहरूको उल्लेख्य उपस्थिति हुने अपेक्षा गरिएको छ ।
कार्यक्रमका संयोजक गणेश पोखरेलका अनुसार प्रदर्शनीमा सहभागी विद्यालयहरूबीच प्रतिस्पर्धा हुनेछ । प्रतियोगितामा उत्कृष्ट हुने विद्यालयलाई नगद ४ लाख रुपैयाँ, दोस्रो हुनेलाई ३ लाख, तेस्रो हुनेलाई २ लाख र सान्त्वना पुरस्कारस्वरूप १ लाख रुपैयाँ प्रदान गरिनेछ। यस्तै, विशेष प्रतिभा देखाउने २५ वटा प्रदर्शनीलाई जनही २५ हजार रुपैयाँका दरले ‘प्रतिभा प्रोत्साहन पुरस्कार’ दिइने बताइएको छ ।
विद्यार्थीहरूको मौलिक अनुसन्धान, आविष्कार तथा प्रविधिसम्बन्धी सिर्जनशीलता प्रदर्शन गर्ने मुख्य उद्देश्य रहेको संयोजक पोखरेलले बताए । कार्यक्रममा पूर्व राष्ट्रपति विद्यादेवी भण्डारीले उद्घाटन गर्ने तय गरिएको छ । प्रदर्शनीको उद्घाटन जेठ २४ गते बिहान ११ बजे पूर्व राष्ट्रपति विद्यादेवी भण्डारीले गर्ने तय भएको छ । प्रदर्शनी अवलोकनका लागि निःशुल्क प्रवेशको व्यवस्था मिलाइएको विभागीय प्रमुख पोखरेलले जानकारी दिएका छन् ।
प्रर्दशनी सम्पन्न गर्न अनुमानित ४४ लाख ५० हजार रुपैयाँ खर्च हुने आयोजकको भनाइ छ । जसमध्ये २० लाख रुपैयाँ कन्सल्टेन्सी तथा व्यवसायिक स्टलहरूबाट संकलन गरिनेछ भने बाँकी रकम झापाका १५ वटा स्थानीय तह र विभिन्न संघसंस्थासँगको सहकार्यबाट जुटाइनेछ । पुरस्कार राशिमात्र १६ लाख रुपैयाँभन्दा बढी रहेको जनाइएको छ।
कार्यक्रममा नेकपा (एमाले) कोशी प्रदेश इञ्चार्ज तथा कोशी प्रदेशका संस्थापक मुख्यमन्त्री शेरधन राईले प्रदर्शनी सबैको साझा अभियान भएकाले सबैलाई सहभागिता जनाउन र अवलोकन गर्न आग्रह गरे । एमाले प्रदेश इन्चार्ज राईले प्रविधिको उपयोग बिना समृद्धिको लक्ष्य पूरा नहुने भएकाले समृद्धिको एउटा खम्बा विज्ञान प्रविधि प्रदर्शनी गर्न लागिएको बताए । प्रदर्शनीबाट समृद्ध नेपाल, सुखी नेपालीको राष्ट्रिय आकांक्षा पूरा गर्न मद्धत पुग्ने विश्वास गरिएको छ ।
