कनकाई खबर \ झापाको कनकाई नगरपालिकामा विविध कार्यक्रम सहित १८औं गणतन्त्र दिवस मनाइएको छ ।
जेठ १५ गते अर्थात गणतन्त्र दिवस र संघीय लोकतान्त्रिक गणतन्त्रात्मक शासन व्यवस्था प्रारम्भ भएको दिनलाई उत्सवका रुपमा मनाइएको हो । निरङकुश एकात्मक राजतन्त्रको विधिवत् अन्त्य गर्दै मुलुकमा संघीय लोकतान्त्रिक गणतन्त्रात्मक शासन व्यवस्था प्रारम्भ भएको दिनलाई उत्सवका रुपमा लिँदै विभिन्न कार्यक्रम गरेर मनाइएको हो ।
यसै अवसरमा कनकाई नगरपालिकाका प्रमुख राजेन्द्रकुमार पोखरेलको अध्यक्षतामा नगरपालिका परिसरमा बिहान झण्डोतोलन साथै शुभकामना आदानप्रदान गरिएको थियो भने साँझ दीप प्रज्वलन सहित शहिदहरुप्रति सम्झना गरिएको छ ।
कार्यक्रममा स्वागत सहित औचित्यमाथि प्रकाश पार्दै नगर उपप्रमुख आशा शिवाकोटीले भएका उपलव्धीको रक्षा गर्ने मुख्य पात्र जनप्रतिनिधि नै भएकाले गणतन्त्र प्राप्तीका क्रममा आफ्नो ज्यानको बलिदानी दिने शहिदहरुको सपना साकार पार्ने कार्यमा सधैं सचेत भएर अघि बढ्न नगर उपप्रमुख शिवाकोटीले सम्बन्धित सबैलाई सुझाव दिएकी छन् । गणतन्त्र दिवसकै अवसरमा शुक्रवार कनकाई नगर अस्पतालमा रहेका बिरामीहरुलाई फलफूल वितरण गरिने बताइएको छ ।
कार्यक्रमलाई सम्बोधन गर्दै नगर प्रमुख राजेन्द्रकुमार पोखरेलले राणा शासन विरुद्धको आन्दोलन होस् या पंचायत विरुद्धको आन्दोलन होस् ,जुनसुकै भएपनि संघीयता प्राप्तीका लागि भएका आन्दोलनका उपलव्धीलाई संस्थागत गरेर जानु आजको आवश्यक्ता भएको बताए ।
गणतन्त्र स्थापनासँगै विकासको गतिले तिव्रता पाएको भन्दै नगर प्रमुख पोखरेलले गणतन्त्र अघि र अहिलेको अवस्थामा भौतिक पुर्वाधारसँगै कृषि, शिक्षा, स्वास्थ्य लगायतका क्षेत्रमा भएको प्रगति उल्लेखनीय रहेको बताए ।
स्थानीय स्तरका प्रत्येक वडा र टोलमा सडक संजालको विकास तिब्र रुपमा अघि बढेको भन्दै नगर प्रमुख पोखरेलले धेरै बाटाहरुको स्तर उन्नतीसँगै कालोपत्रे र ब्लक लगाउने काम सम्पन्न भएको बताए ।पूर्वाधार सहित सामाजिक विकासका विभिन्न क्षेत्रमा आम नागरिकहरुलाई पहिलेको भन्दा राम्रो सुबिधा दिन सकेको नगर प्रमुख पोखरेलको भनाई थियो । यति हुँदाहुँदै पनि गर्नु पर्ने काम अझै धेरै भएकाले नगरका जनप्रतिनिधि र कर्मचारीले समेत आर्थिक पारदर्शिता तर्फ उन्मुख हुन नगर प्रमुख पोखरेलले निर्देशन दिए । कनकाई नगर अस्पतालका लेखापाल लक्ष्मीप्रसाद अधिकारीले संचालन गरेको औपचारिक कार्यक्रममा २०६२ \ ०६३ को जनआन्दोलनका घाइते कनकाई वडा नं.७ निवासी लक्ष्मीप्रसाद शिवाकोटीको समेत उपस्थिती रहेको बताइएको छ । गणतन्त्र दिवसकै अवसर पारेर कनकाई वडा नंं. ४, वडा नं. ७ लगायत अन्य वडाकार्यालयले समेत सरसफाई सहित विविध कार्यक्रम सम्पन्न गरेको बताइएको छ ।
