कनकाई खबर \ नारायणी मेमोरियल फाउन्डेसन, कन्काई नगरपालिका–४ र कन्काई प्रतिभा प्रतिष्ठान, कन्काईको संयुक्त आयोजनामा झापा जिल्ला स्तरीय ‘मेरो गौरव, मेरो राष्ट्र’ विषयक युवा कविहरूको कविता प्रतियोगिता सम्पन्न भएको छ ।
प्रतियोगितामा सहभागी प्रतियोगी युवा कविहरू मध्येबाट खेमनाथ गुरागाई प्रथम , पूर्णचन्द्र मैनाली द्वितीय र तेजेन्द्र घिमिरे तृतीय भएका छन् । उनीहरुलाई क्रमशः पन्ध्र हजार, दश हजार र पाँच हजार नगद पुरस्कार प्रदान गरिएको छ ।
कन्काई प्रतिभा प्रतिष्ठानका कार्यवाहक अध्यक्ष डा. पुण्यप्रसाद सिग्देलको अध्यक्षतामा कविता प्रतियोगिता एवं नारायणी मेमोरियल फाउन्डेसनको शैक्षिक सत्र २०८२ को लागि झापा जिल्लाका २६ वटा विद्यालयका ४० जना छात्र छात्रालाई छात्रवृत्ति वितरण कार्यक्रम सम्पन्न भएको छ । कार्यक्रममा युग कवि सिद्धिचरण श्रेष्ठ एवं नारायणी मेमोरियल फाउन्डेसनको अनन्त स्मृतिमा अङ्कित पूर्वज एवं प्रियजनहरूको स्मृति र सम्मानमा एक मिनेट मौन धारणा गरी कार्यक्रमको सुरुवात गरिएको थियो ।
मेची बहुमुखी क्याम्पसका प्रा. डा. गंगाप्रसाद अधिकारीको प्रमुख आतिथ्य एवं कन्काई नगरपालिकाका उपप्रमुख आशा शर्मा शिवाकोटीको विशिष्ट आतिथ्यमा सम्पन्न कार्यक्रमको सुरुमा विद्यार्थीहरूबाट नारायणी मेमोरियल फाउन्डेसनको स्वागत गीत प्रस्तुत गरिएको थियो । कन्काई प्रतिभा प्रतिष्ठानका तर्फबाट निर्मलकुमार खतिवडाले स्वागत गरेको कार्यक्रममा रुद्र–गौरी श्री–अम्बिका ओली प्रतिष्ठानका अध्यक्ष गंगाप्रसाद ओली, निर्णायक समितिका तर्फबाट प्रा.डा. ठाकुरप्रसाद पोखरेल, प्रधानाध्यापकका तर्फबाट आदर्श विद्या मन्दिर मा. वि. घैलाडुबाका प्र.अ. नरहरि न्यौपानेले शुभकामना मन्तव्यराखेका थिए ।
कार्यक्रममा नारायणी मेमोरियल फाउन्डेसनका अध्यक्ष वरिष्ठ अधिवक्ता नरेन्द्रप्रसाद पाठकले फाउन्डेसनका गतिविधिबारे प्रकाश पारेका थिए । कार्यक्रममा अक्षयकोषदाताहरूले विद्यार्थीहरूलाई छात्रवृत्ति रकम र शैक्षिक सामग्री वितरण गरेका थिए । कन्काई प्रतिभा प्रतिष्ठानका सचिव प्रेमप्रसाद न्यौपानेले सञ्चालन गरेको कार्यक्रममा छात्रवृत्ति वितरण कार्यक्रमको सहजीकरण नारायणी मेमोरियल फाउन्डेसनका सचिव प्रदीप पाठक र छात्रवृत्ति समितिका सचिव रामकुमार पाठकले गरेका थिए ।
