पाइपलाइनमा सोझै मोटर जडान गर्ने उपभोक्ताको धारा बन्द गर्दै सुरुङ्गा खानेपानी संस्था
कनकाई खबर \ झापाको कनकाई नगर क्षेत्रको सबैभन्दा पुरानो खानेपानी संस्था सुरुङ्गा खानेपानी तथा सरसफाई सामुदायिक उपभोक्ता संस्थाले पाइपलाइनमा सोझै मोटर जडान गर्ने उपभोक्ता सदस्यको धारा बन्द गर्न सुरु गरेको छ ।
पाइपलाइनमा सोझै मोटर जडान गर्दा अन्य उपभोक्तालाई प्रत्यक्ष असर परेका कारण त्यस्ता उपभोक्ताको धारा बन्द गर्न सुरुवात गरेको संस्थाका अध्यक्ष भीमप्रसाद अधिकारी बताउँछन्।
संस्थाले विगत २०८१ को सुरुवाती अवस्थादेखि नै खानेपानी पाइपलाइनमा सोझै मोटर जडान नगर्नु भनी बारम्बार सूचना जारी गर्दा पनि अटेर गरी खानेपानी पाइपलाइनमा सोझै मोटर जडान गरेर पानी तानीरहेका उपभोक्ताको घरमै गएर खानेपानीको मिटर बन्द गर्ने कार्य सुरु गरेको संस्थाका अ्रध्यक्ष अधिकारीले जानकारी दिए ।
विशेष गरी सुरुङ्गा बजारको पुर्व तर्फ अतिथी सदन टोलका करिब ३५ घर उपभोक्ताले पाइपलाइनमा सोझै मोटर जडान गरेका कारण अन्य उपभोक्ताहरु समस्यामा पर्न थालेपछि खानेपानी संस्थाले आफ्नै उपभोक्ता सदस्यको धारा बन्द गर्न बाध्य हुनु परेको संस्थाका सचिव गोपाल खरेलले जानकारी दिए । यस अघि नै सम्पन्न सर्वदलीय बैठकको निर्णय साथै विभिन्न चरणमा भएको सार्वजनिक सुचनालाई समेत अटेर गरी बसेका उपभोक्ताहरु मध्ये पहिलो चरणमा ५ जना उपभोक्ताको धारा बन्द गरिएको सचिव खरेल बताउँछन् ।
हरेक पल अत्यन्तै आवश्यक पर्ने शुद्ध पिउने पानीको धारा बन्द हुँदा दैनिक जीवनमा समस्या पर्ने भएपछि धारा बन्द भएका दुईवटा परिवारले संस्थाको नियम अनुसार तत्काल धारा खुल्ला गरेको बताइएकोछ । अन्य तीनवटा परिवारबाट समेत भोलीपल्ट नै आवश्यक प्रक्रिया पूरा गरेर बन्द भएको धारालाई पुनः सुचारु गरिएकोे संस्थाका सचिव खरेलले जानकारी दिए । अझै पनि केही उपभोक्ताले अटेर गरेर पाइपलाइनमा सोझै मोटर जडान गरेको जानकारीमा आएकाले चाँडै दोस्रो चरणको अभियान संचालन गर्ने तयारीमा संस्था रहेको बताइएको छ ।
