शिवसताक्षी \ शिवसताक्षी ८ झिलझिलेका एक किशोर २४ घण्टा लामो समयदेखि बेपत्ता भएका छन् । झिलझिले माध्यमिक विद्यालयमा कक्षा १० मा अध्ययनरत १६ वर्षीय प्रचिन लुइटेल आइतबार दिउँसोदेखि सम्पर्कबिहीन भएका हुन् ।
परिवारका अनुसार प्रचिन आफ्नी दिदी पुष्पा लुइटेलसँग शनिवार काँकरभिट्टा गएका थिए । पुष्पाले भनिन् ‘ शनिवार भएकाले ऊ स्कूल गएको थिएन । भाइलाई एक्लै घरमा छोड्न भन्दा पनि आफैसँग लैजान मैले उचित ठानेँ । हामी दुवै जना आफन्त भेट्न काकडभिट्टाको बर्मेली टोल गएका थियौँ । घरायसी सामान किन्न म पानी ट्याङ्की जानुअघि भाइलाई ठुलो मम्मिको घरमै छोडेकी थिएँ । फर्केर आउँदा उनी घरमा थिएनन् ।’ ठूलो मम्मीको अनुसार ‘शौचालय जान्छु भनेर घर बाहिर निस्केका थिए । तर त्यसपछि उनी अहिले सम्म सम्पर्कमा आएका छैनन्,’ दिदी पुष्पाले भनिन् ।
बेपत्ता किशोरका परिवार, अन्य आफन्तले चिनजानको ठाउँ र काँकरभिट्टाका गल्ली–गल्लीसम्म खोजी गरे पनि उनी फेला परेका छैनन् । स्थानीय प्रहरीको सहयोगमा सिसी क्यामेराका फुटेजसमेत हेर्यौ तर किशोरको अत्तो पत्तो नभएको खोजीमा संलग्न आफन्तले बताएका छन् ।
बेपत्ता प्रचिनको खोजीमा परिवारले सञ्चारकर्मी, प्रहरी, कानुन व्यवसायी लगायत आम नागरिकसँग सहयोगको अपिल गरेका छन् । किशोर बेखबर भएपछि आफन्तले इलाका प्रहरी कार्यालय काँकरभिट्टा र इलाका प्रहरी कार्यालय झिलझिलेमा समेत लिखित उजुरी दिएको बताएका छन् ।
जिल्ला प्रहरी कार्यालय झापाले पनि किशोर बेपत्ता भएको पुष्टि गरेको छ । प्रहरी नायब उपरीक्षक (डीएसपी) खगेन्द्रबहादुर खड्काले भने, ‘हामीले खबर प्राप्त गरेपछि मातहतका सम्पूर्ण प्रहरी इकाईलाई सूचना पठाएका छौं । यतिबेला खोजी कार्य तीव्र पारिएको छ ।’
आफन्तले पनि कुनै कारणले बेखबर भएको भए प्रचिनलाई घर फर्कन अनुरोध गरेका छन् ।
किशोरकी आमाको कोरोना संक्रमण भएर मृत्यु भएको थियो । बाबु बैदेशिक रोजगारमा छन् । उनी दिदी पुष्पासँग बस्दै आएका थिए ।
