कनकाई खबर \ झापाको कनकाई नगरपालिकाले व्यवस्थित आयोजना कार्यान्वयनका लागि आयोजना बैंक बनाउने भएको छ ।
आयोजना बैंक निर्माणले स्थानीय तहकै व्यवस्थित विकास निर्माणमा थप सहयोग पुग्ने विश्वासका साथ कनकाई नगरपालिकाले आयोजना बैंक निर्माण गरी कार्यान्वयनमा ल्याउने तयारी गरेको बताइएको छ । यसै अवसरमा सरोकारवालाहरुलाई आयोजना बैंक सम्बन्धि जानकारी गराउँने उद्येश्यले कनकाई नगरपालिकाले नगरका सबै वडामा आयोजना बैंक तर्जुमा सम्बन्धि अभिमुखीकरण कार्यक्रमलाई तिब्रता दिन थालेको बताइएको छ । कनकाई नगरपालिकाका प्रमुख राजेन्द्रकुमार पोखरेलको अध्यक्षतामा नगरपालिकाको सभा हलमा पहिलो चरणको अभिमुखीकरण कार्यक्रम सम्पन्न भएको हो ।
हुमेन डेभलप्मेन्ट एण्ड रिसर्च सेन्टर नेपालको प्राविधिक सहयोगमा अभिमुखीकरण कार्यक्रमलाई तिब्रता दिएको बताइएको छ । आयोजना बैंक तर्जुमा गर्ने कार्य नेपालका ७५३ स्थानीय तहहरु मध्ये कनकाई नगरपालिका देशकै दोस्रो स्थानमा रहेको रिसर्च सेन्टरका योजनाविद डा.कृष्णबहादुर राई बताउँछन् । यस आयोजना बैंकबाट स्थानीय नागरिक प्रत्यक्ष रुपमा लाभान्वीत हुने विश्वास गरिएको छ । अभिमुखीकरण कार्यक्रमका लागि सहजकर्ताको रुपमा राईसँगै लोकप्रिय खनाल समेत रहेका छन् ।
स्थानीय नागरिकहरुको आर्थिक एवं सामाजिक समृद्धिमा प्रत्यक्ष फाइदा पुर्याउने किसिमका आयोजनाहरु छनौट गरी लगानी गर्ने वातावरण सिर्जना गर्नका लागि कनकाई नगरपालिकामा आयोजना बैंक बनाउँन लागिएको कनकाई नगरपालिकाका प्रमुख राजेन्द्रकुमार पोखरेल बताउँछन् । व्यवस्थित आयोजना बैंक तर्जुमाका कारण नगरपालिकाको आगामी कार्ययोजना सहज र सरल बन्न सक्नेमा आँफू विश्वस्त रहेको नगर प्रमुख पोखरेलको भनाइ छ । आयोजना बैंक निर्माण र स्विकृतिपछि दस्तावेजमा समावेश गरिएका योजनाहरुको कार्यान्वयनलाई पहिलो प्राथमिकतामा राखिने नगर प्रमुख पोखरेलले प्रतिवद्धता जनाए ।
संघीय र प्रदेश सरकारले मात्र आयोजना बैंक बनाई कार्यान्वयन गर्दै आएको भएपनि अब स्थानीय तहले पनि आयोजना बैंक बनाई कार्यान्वयन गर्नुपर्ने गरी राज्यको नीतिमा उल्लेख भएअनुसार कनकाई नगरपालिकाको कार्यालय कार्यन्वयन तर्फ अघि बढेको बताइएको छ । राज्यको नीति अनुसार स्थानीय तहले आर्थिक वर्षको नीति, कार्यक्रम तथा बजेट निर्माण गर्ने क्रममै आयोजना बैंकको अवधारणा समावेश गर्नुपर्ने बताइएको छ । जसका कारण कनकाई नगरपालिकाले सम्बन्धित सबैसँग अभिमुखीकरण कार्यक्रम मार्फत सचेतना जगाउँदै प्रक्रिया अघि बढाएको नगरपालिकाका प्रमुख प्रशासकीय अधिकृत नारायण न्यौपाने बताउँछन् ।
