कनकाई खबर \ झापाको कनकाई नगर क्षेत्रकै सबैभन्दा ठूलो सामुदायिक भवनका रुपमा रहेको कनकाई १ स्थित नर्वदेश्वर शिवालय सामुदायिक भवनमा आज बुधबारदेखी श्रीमद् भागवत सप्ताह ज्ञान महायज्ञ सुरु हुने भएको छ ।
कनकाई १ स्थित श्री नर्वदेश्वर शिवालय संरक्षण समितिले आयोजना गरेको महायज्ञको सम्पूर्ण तयारी पूरा भई आज कलश यात्राको कार्यक्रम तय भएको जनाइएको छ । महायज्ञ सहज रुपमा सम्पन्न गर्न समितिका अध्यक्ष सुलोचना ओलीको संयोकत्वमा ९ सदस्यीय मुल समारोह समिति, त्यस्तै विभिन्न ७ वटा उपसमितिहरु समेत निर्माण गरिएको आयोजक समितिले जनाएको छ ।
ज्योतिषी गुरुप्रसाद तिम्सिनाको संयोजकत्वमा सल्लाहकार उपसमिति, चुडामणि ढकालको संयोजकत्वमा प्रचारप्रसार उपसमिति, विष्णु ओलीको संयोजकत्वमा आर्थिक एवं सामाग्री खरिद उपसमिति, सुलोचना ओलीको संयोजकत्वमा अतिथी सत्कार उपसमिति, ईन्द्रप्रसाद अधिकारीको संयोजकत्वमा व्यास, मण्डव तथा गुरुपुरोहित व्यवस्थापन उपसमिति, खगेन्द्र बरालको संयोजकत्वमा भवन तथा व्यास मण्डव परिसर सरसफाई उपसमिति, लेखनाथ कोइरालाको संयोकत्वमा खाद्यन्न व्यवस्थापन उपसमिति निर्माण गरिएको छ ।
जामुनबारी चोक दक्षिण तर्फ निर्माणाधिन अवस्थामा रहेको यस सामुदायिक भवनको पूर्णताका लागि आज २४ गते बुधबारदेखी ३१ गते सम्म महायज्ञ संचालन हुने आयोजक समिति अध्यक्ष सुलोचना ओलीले जानकारी दिएकी छन् । पुर्व पश्चिम राजमार्गको जामुनबारी चोकबाट करिब ५ सय मिटर दक्षिणमा रहेको धुँवा, धुलो र प्रदुषणमुक्त यस क्षेत्रमा आयोजना गरिएको महायज्ञमा उपस्थित भएर कथा श्रवणका लागि आयोजक समितिले सबैमा हार्दिक अपिल गरेको छ ।
महायज्ञमा प्रमुख कथा बाचक आचार्य पण्डित छन्दुराम भण्डारी र उपबाचकमा पण्डित बिरेन्द्र दहाल रहेको बताइएको छ । महायज्ञको पहिलो दिन आज २४ गते बुधबार बिहान ११ बजे कलश यात्राको कार्यक्रम तय गरिएको छ भने एक बजे पछिको समयमा औपचारिक कार्यक्रम मार्फत उद्घाटन विशेष समारोहको आयोजना गरिएको महायज्ञ आयोजक समितिका सचिव ऋषिकेश खतिवडाले जानकारी दिए ।
महायज्ञ उद्घाटनसँगै मण्डप पुजा, पाठ तथा कथा आरम्भ, साँझमा महात्म्य र भजन किर्तनको कार्यक्रम रहेको प्रचार समितिका सदस्य दिपक चापागाईँले जानकारी दिए । यसपछिका दिनहरुमा सात दिनसम्म हरेक दिन बिहान ७ बजेदेखी सुरु भई पूजा अर्चना , पाठपारायण, कथा प्रवचन, आरती पुष्पाञ्जली सहित साँझ ७ बजेदेखी ९ बजे सम्म महात्म्य, ज्ञानमञ्च एवं भजनकिर्तनको कार्यक्रम दैनिक रुपमा संंचालन हुने बताइएको छ । पवित्र उद्येश्यले आयोजना गरिएको यस महायज्ञमा हरेक दिन उपस्थित भएर संगीतमय कथा श्रवणका लागि आयोजक समितिले विशेष आग्रह गरेको छ ।