कनकाई खबर / झापाको कनकाईमा जारी जिल्ला स्तरीय महिला फुटबल प्रतियोगिता अन्तर्गत मंगलबार भएको खेलमा गौरादह महिला फुटबल टिमलाई हराउँदै शिवसताक्षी महिला फुटबल टिम विजयी बनेको छ ।
कनकाई खेलकुद प्रतिष्ठानको आयोजनामा पुर्वकै प्रसिद्ध पर्यटकीयस्थल जामुनबारी सामुदायिक वन एवं जामुनखाडी सिमसार तथा पर्यटकीय क्षेत्रको खेल मैदानमा मंगलबार सम्पन्न खेलमा गौरादह महिला फुटबल टिमलाई ८–० गोलको फराकिलो अन्तरले हराउँदै शिवसताक्षीले सेमी फाइनलको यात्रा तय गरेको हो । खेलको म्यान अफ द म्याच विजेता टिमकै पास्वती चौधरी घोषित भइन् ।
खेलको पहिलो हापमा २ गोल लगाएको शिवसताक्षीले दोस्रो हापमा थप ६ गोल थपेको थियो। बुधबारदेखि सेमिफाइनलको खेल सुरु हुने र पहिलो सेमिफाइनलमा काकरभिट्टाको महिला फुटबल टिम र बाह्रदशीको महिला फुटबल टिमबीच प्रतिस्पर्धा हुने खेल संयोजक गीता खरेलले जानकारी दिएकी छन् ।
प्रतियोगिताको विजेताले १ लाख १ हजार रुपैयाँ र उपविजेताले ५१ हजार रुपैयाँसहित ट्रफी मेडल र प्रमाणपत्र पाउने आयोजक कनकाई खेलकुद प्रतिष्ठानका अध्यक्ष छवि थपलियाले जानकारी दिए ।
जिल्लाका ८ टिम सहभागी प्रतियोगिताको फाइनल खेल आगामी चैत २ गते हुनेछ । प्रतियोगिताको मुख्य प्रायोजक कनकाई नगरपालिका रहेको छ । जामुनबारी सामुदायिक वन उपभोक्ता समूह एवं जामुनखाडी सिमसार तथा पर्यटकीय क्षेत्र सहआयोजकका रुपमा रहेको प्रतियोगितामा सहयोगी संस्थाका रुपमा कनकाई नगरपालिका वडा नं.२ को कार्यालय, जामुनखाडी स्पोर्टिङ क्लव र जामुनबारी किर्तन मण्डली रहेको बताइएको छ ।
