कनकाई खबर / झापाको कनकाई नगरपालिका अन्तर्गतका नौ वटै वडामा ११५ औं अन्तर्राष्ट्रिय महिला दिवस विविध साँस्कृतिक कार्यक्रमका साथ मनाइएको छ ।
‘सबै महिला र बालबालिकाको लागि अधिकार, समानता र शसक्तिकरण’ भन्ने मूल नाराका साथ सबै वडा कार्यालयले अलग अलग रुपमा कार्यक्रम सम्पन्न गरेको हो । सोही अवसरमा कनकाई नगरपालिका वडा नंं. ३ को आयोजनामा भएको महिला दिवस विशेष कार्यक्रममा वडा स्थित योगमाया न्यौपानेको शालिकमा पुष्प गुच्छा सहित फूलमाला अर्पण गरिएको थियो ।
कार्यक्रममा कनकाई नगरपालिकाका प्रमुख राजेन्द्रकुमार पोखरेलले योगमायाले समाज सुधारमा गरेको योगदान, तत्कालीन समाजको चेतनाको स्तर, यसले राणा शासनमा परेको प्रभाव लगायतका विविध विषयमा चर्चा गरेका थिए । योगमायाको शालिकमा पुष्पगुच्छा अर्पणको कार्यक्रम सम्पन्न भएसँगै सुरुङ्गा जेसीजको सभा हलमा औपचारिक कार्यक्रमको आयोजना गरिएको थियो ।
कार्यपालिका सदस्य कृष्णमाया भुजेलको अध्यक्षता एवं कनकाई नगरपालिकाकी उपप्रमुख आशा शिवाकोटीको प्रमुख आतिथ्यमा जेसीज भवनमा सम्पन्न औपचारिक कार्यक्रममा वडाका जेष्ठ माताहरुलाई सम्मान गरिएको कनकाई नगरपालिकाकी स्वास्थ्य शाखा कर्मचारी टिका दवाडीले जानकारी दिएकी छन् ।
कनकाई नगरपालिकाकी कर्मचारी रन्जीता कट्टेलको स्वागत एवं शिक्षासेवी चम्पा खनाल सुवेदीले औचित्यमाथि प्रकाश पारेको कार्यक्रममा विविध साँस्कृतिक प्रस्तुतीहरु समेत दिइएको थियो ।
