कनकाई खबर / प्रथम कोशी प्रदेश स्तरीय महिला फुटबल प्रतियोगिताको उपाधि झापाको पोल्टामा परेको छ ।
आइतबार विराटनगरमा भएको फाइनल खेलमा पाँचथरलाई ३/० को गोल अन्तरले पराजित गर्दै झापाले उपाधि जितेको हो । प्रथम कोशी खेलकुद महोत्सव २०८१ अन्तर्गत भएको प्रतियोगितामा झापाले उपाधिसँगै १ लाख रुपैयाँ, ट्रफी, मेडल प्राप्त गरेको छ भने उपविजेता पाँचथरले ५० हजार रुपैयाँमा चित्त बुझाएको छ ।
प्रतियोगिताका लागि सहभागी टिममा कनकाई नगरपालिकाका नौ जना खेलाडी सहभागी थिए । प्रतियोगितामा कनकाईकी जेनिफर मगर प्लेयर अफ द टुर्नामेन्ट र हाइ स्कोरर घोषित हुँदै २० हजार साथै १५ हजार रुपैयाँ प्राप्त गरिन् ।
त्यस्तै, कनकाईकी सिम्रन राई बेस्ट मिड फिल्डर, बेस्ट डिफेन्स नेहा चौधरी, वेस्ट गोलकिपर सुशीला चौधरी, बेस्ट फर्वाड पूर्णिमा राई, प्लेयर अफ द म्याच मनिता तुम्रोक घोषित हुँदै जनही १० हजार रुपैयाँ पाएका छन् ।
प्रतियोगितामा वेस्ट कोचका रुपमा झापा कनकाईका सन्त रायमाझी घोषित भएका छन् । रायमाझीले कनकाई नगरको खेलकुद राजदुत र कोच नियुक्त भएसँगै कनकाई नगरपालिकाका महिला खेलाडीले विभिन्न प्रतियोगितामा उपाधि हात पार्नुका साथै दर्बिलो उपस्थिति जनाउँदै आएका छन् ।
विजेता टिम र खेलाडीलाई कार्यक्रमका प्रमुख अतिथि कोशी प्रदेशका मुख्यमन्त्री हिक्मत कार्कीले उपाधि प्रदान गरेका थिए । झापाली टिमलाई हौसला प्रदान गर्न कनकाई नगरपालिकाका नगर प्रमुख राजेन्द्रकुमार पोखरेल, कनकाई वडा नं.४का वडाअध्यक्ष रोशन सुवेदी, कनकाई नगरका खेलकुद राजदुत सन्त रायमाझी, कनकाई नगर खेलकुद विकास समितिका अध्यक्ष जविन तिम्सिना, उपाध्यक्ष गोविन्द उप्रेती, कनकाई खेलकुद प्रतिष्ठानकी पुर्व उपाध्यक्ष अम्बिका खरेल, कनकाई नगरपालिकाका कर्मचारी विजय पाठक लगायतको टिम विराटनगर पुगेको थियो ।
