कनकाई खबर \ झापाको कनकाई नगरपालिकामा ८१.३४ प्रतिशत किशोरीलाई पाठेघरको मुखको क्यान्सर रोगविरूद्वको एच.पि.भी. खोप लगाइएको छ ।
३ हजार ९९ किशोरी रहेको कनकाई नगरपालिकामा २ हजार ५ सय २१ जना किशोरीलाई खोप लगाएको कनकाई नगरपालिकाको स्वास्थ्य शाखाले जनाएको छ ।
झापा जिल्लामा माघ २८ गते सोमबार सम्ममा विद्यालयमा अध्ययन गर्ने ९२.६२ प्रतिशत र विद्यालय बाहिरका ३०.११ प्रतिशत किशोरीहरु सहित जम्मा ८३.०५ प्रतिशत बालिकाहरुले एच.पि.भी. खोप लगाएको जिल्ला स्वास्थ्य कार्यालय झापाका प्रमुख रमेश बारकोटीले जानकारी दिए । जिल्लामा ७५५ खोप केन्द्रबाट ७८१ स्वास्थ्यकर्मीले माघ २९ गते सम्म खोप लगाउने कार्यक्रम रहेको बारकोटीले बताए। नेपाल सरकारले नियमित खोपको रुपमा प्रत्येक वर्षको फागुन महिनालाई पाठेघरको मुखको क्यान्सर विरुद्धको एच.पि.भी. खोपलाई समेत अभियानका रुपमा अघि बढाउँने जनाइएको छ ।
खोप लगाउने किशोरीहरुमा विद्यालय जाने छात्राहरु मध्ये कक्षा ६ का ५ सय २४ जना र विद्यालय नजाने १० वर्ष उमेरका किशोरीहरु ३ जना गरी जम्मा ५२७ जना रहेका छन् । त्यस्तै कक्षा ७ देखि कक्षा १० सम्म अध्ययन गर्ने १ हजार ९ सय ४४ जना र विद्यालय नजाने ११ देखी १४ वर्षका किशोरी ५० जना गरी जम्मा १ हजार ९ सय ९४ जनालाई खोप लगाएको कनकाई नगर जनस्वास्थ्य निरीक्षक तथा खोपका फोकल पर्सन नारायण अधिकारीले जानकारी दिए ।
स्वास्थ्य कार्यालय झापाको समन्वयमा कनकाई नगरमा माघ २२ गतेबाट २८ गते सम्म एच.पि.भी. खोप अभियान सञ्चालन भएको थियो । जसका लागि ३९ खोप केन्द्रमा स्वास्थ्यकर्मी, स्वयंसेवक र सुपरिवेक्षक गरि २ सय जना स्वास्थ्यकर्मी खटाइएको कनकाई नगरपालिकाका जनस्वास्थ्य निरीक्षक केशव रिजालले जानकारी दिए ।
खोप अभियानका क्रममा प्रत्येक केन्द्रमा अनुगमनलाई समेत तिव्रता दिएको थियोे । खोप समन्वय समितिका संयोजक समेत रहेका कनकाई नगर प्रमुख राजेन्द्रकुमार पोखरेल सहित उपप्रमुख आशा शिवाकोटी, प्रमुख प्रशासकीय अधिकृत नारायण न्यौपाने , जन स्वास्थ्य निरीक्षक केशव रिजाल , जनस्वास्थ्य निरीक्षक तथा खोपका फोकल पर्सन नारायण अधिकारी, सिनियर अनमी टीका दवाडी लगायतले अनुगमनलाई तिब्रता दिएको बताइएको छ ।
कनकाई नगरपालिका स्वास्थ्यका सम्पुर्ण कर्मचारी, आम अभिभावक , विद्यालयक शिक्षक –शिक्षिका, जनप्रतिनिधि अन्य कर्मचारी विभिन्न संघ–संस्था लगायतको सक्रियताले पनि यो खोप लगाउने अभियान सफल भएको खोप समन्वय समितिका संयोजक नगर प्रमुख पोखरेल बताउँछन् ।
नेपाल सरकार स्वास्थ्य तथा जनसंख्या मन्त्रालयले पाठेघरको मुखको क्यान्सर बिरुद्धको एच.पि.भी.खोप देशैभरी एकैसाथ अभियानको रुपमा सञ्चालन गरेको हो । २०८१ माघ २२ गतेदेखि फागुन ६ गतेसम्म सञ्चालन हुने यो अभियानलाई स्वास्थ्य मन्त्रालय र स्वास्थ्य सेवा बिभाग अन्तर्गत रहेका सम्पूर्ण खोप कार्यक्रमका लागि सूचीकृत स्वास्थ्य संस्थाहरुबाट एकैसाथ एच.पि.भी. खोप दिएको बताइएको छ । कक्षा ६ देखि १० कक्षा सम्म अध्ययन \ अध्यापन हुने बिद्यालयलाई खोप केन्द्रको रुपमा स्थापना गरी निःशुल्क रुपमा राष्ट्रीय खोप अभियान सञ्चालन भएको जनाइएको छ । महिलाहरुमा हुने पाठेघरको क्यान्सर जस्तो घातक रोगबाट भविष्यका कर्णधारको रुपमा रहेका बालिकाहरुको स्वास्थ्य सुरक्षालाई मध्यनजर गर्दै अभियान संचालन भएको हो ।
यो रोगको लक्षणहरूमा तल्लो पेट दुख्ने, योनीबाट गन्हाउने पानी बग्ने, अनियमित रूपमा रगत बग्ने, कमजोरी महसुस हुने, रक्त अल्पता हुने लगायत रहेको बताइएको छ ।
