कनकाई खबर \ कनकाईमा जारी झापा जिल्ला पालिकास्तरीय पुरुष फुटबल प्रतियोगिताको सातौं संस्करण “कनकाई कप २०८१” को चौथो दिनको खेलमा कचनकवललाई पाखा लगाउदै कनकाई क्वाटरफाइनलमा प्रवेश गरेको छ ।
कनकाई खेलकुद प्रतिष्ठानको आयोजना तथा कनकाई नगरपालिकाको प्रायोजनमा कनकाई माविको खेल मैदानमा जारी प्रतियोगिताको चौथो दिन सोमबार कचनकवल र कनकाई बिच भएको खेलमा कचनकवललाई पेनाल्टी सुटआउटबाट हराउँदै कनकाई क्वाटर फाईनलमा प्रवेश गरेको हो ।
खेलको पहिलो हाफको २० औं मिनेटमा कचनकवलका खेलाडी मिक्सन थेवेले गोल गर्दै टिमलाई अगाडि बढाएका थिए । त्यसको २ मिनट नबित्दै कनकाईका खेलाडी रोशन बर्देवाले खेलको २२ औं मिनेटमा गोल गर्दै बराबरी गरेका थिए भने त्यसको २ मिनेट नबित्दै खेलको २४ औं मिनेटमा पुनः कनकाईका खेलाडी रुचन लिम्बुले गोल गर्दै कनकाईलाई २–१ गोलको अग्रता दिलाएका थिए ।
खेलको दोस्रो हाफको २८ आंै मिनेटमा कचनकवलका खेलाडी गोविन लिम्बूले गोल गर्दै खेललाई २–२ को बराबरी गरेपछि दुबै तर्फबाट निर्धारित समयमा कुनै पनि थप गोल हुन नसक्दा खेलको निर्णय पेनाल्टी सुटआउटबाट गरिएको थियोे । पेनाल्टीमा कनकाईले ४ गोल गर्दा कचनकवलले २ गोल मात्रै गरेपछि कनकाई विजयी बनेको हो ।
खेलको म्यानअफ दी म्याच बिजेता टिमका खेलाडी रोशन बर्देवा घोषित भए । उनले म्यानअफ दी म्याचको मेडल र नगद २ हजार एक सय रुपैयाँ प्राप्त गरे । म्यानअफ दी म्याचको नगद कनकाई धाम धार्मिक विकास संस्थाकी उपाध्यक्ष समेत रहेकी प्रतिष्ठानकी निवर्तमान उपाध्यक्ष अम्बिका खरेलले प्रदान गरेकी थिइन् ।
माघ २५ गते शुक्रबारबाट सुरु भएको खेल फागुन ७ गते सम्पन्न हुनेछ भने खेलमा जिल्लाका १२ पालिकाको सहभागिता रहेको छ । प्रतियोगिताको बिजयी हुने टिमले नगद १ लाख १५ हजार तथा उपबिजयी हुने टिमले नगद ६१ हजार रुपैँया साथै दुबै टिमले ट्रफी , मेडल र प्रमाणपत्र पाउने आयोजक संस्था प्रतिष्ठानका उपाध्यक्ष समेत रहेका खेल संयोजक भुवन खतिवडाले जानकारी दिए । प्रतियोगितामा मंगलबारको खेल अर्जुनधार नगरपालिका र झापा गाउँपालिका बिच हुने बताइएको छ ।
प्रतियोगीता अवधिभरका लागि एम्बुलेन्स सेवाको सहयोग कनकाई नगर अस्पताल र नेपाल रेडक्रस सोसाइटी सुरुङ्गा उपशाखाबाट भएको छ भने स्वास्थ्य सेवाको सहयोग सुरुङ्गास्थित न्युरो मेडिसिन सेन्टरबाट संचालक सरोज ठाकुरले गरिरहेको बताइएको छ । प्रतिष्ठानका अध्यक्ष छबि थपलियाको अध्यक्षता रहेको चौथो दिनको प्रतियोगितामा कनकाई नगरपालिकाका प्रमुख प्रशासकीय अधिकृत नारायण न्यौपानेको प्रमुख आतिथ्य रहेको थियो ।
कार्यक्रमलाई सम्बोधन गर्दै प्रमुख अतिथी न्यौपानेले युवाहरुका लागि खेलकुद अनुशासनको पाठ सिकाउने एउटा भरपर्दो माध्यम भएको बताए ।खेलकुदले युवाहरुलाई दुव्र्यसनीबाट टाढा राख्न सक्ने कुरामा जोड दिँदै प्रमुख प्रशासकीय अधिकृत न्यौपानेले समाज रुपान्तरणमा समेत खेलकुद प्रतियोगिता एउटा महत्वपूर्ण अस्त्र भएको बताए । औपचारिक कार्यक्रमको संचालन प्रतिष्ठानका सचिव रामप्रसाद निरौलाले गरेका थिए ।
