कनकाई खबर \ कनकाईमा जारी झापा जिल्ला पालिकास्तरीय पुरुष फुटबल प्रतियोगिताको सातौं संस्करण “कनकाई कप २०८१” को दोस्रो दिनको खेलमा हल्दिबारी विजयी बनेको छ ।
कनकाई खेलकुद प्रतिष्ठानको आयोजना तथा कनकाई नगरपालिकाको प्रायोजनमा कनकाई माविको खेल मैदानमा जारी प्रतियोगिताको दोस्रो दिन हल्दिबारी गाउँपालिका र गौरादह नगरपालिका बिच भएको खेलमा ५–० गोल अन्तरले गौरादहलाई पछि पार्दै हल्दिबारी बिजयी बनेको हो ।
खेलको पहिलो हाफ गोल रहित प्रतिस्पर्धात्मक देखिएको प्रतियोगितामा दोस्रो हाफको १२ औ मिनटमा गौरादहको डिबक्समा गौरादहकै खेलाडीको हातमा बल ठोकिए पछि हल्दिबारीले पाएको पेनाल्टीलाई हल्दिबारीका जर्सी नं. ११ का खेलाडीले गोलमा परिणत गर्दै टिमलाई अग्रता दिलाएका थिए ।
हल्दिबारीको जितका लागि दोस्रो हाफको २६ औं मिनट र खेलको अतिरिक्त समयमा हल्दिबारीका जर्सी नं. १७ का खेलाडी अरुण राईले गोल गरेका थिए भने जर्सी नं. ४ का खेलाडी सुरज उराउले खेलको दोस्रो हाफको ३१ औ र ३५ औ मिनटमा गोल गरेका थिए ।
गौरादहले भने खेलमा कुनै पनि गोल गर्न नसक्दा ५–० को फराकिलो अन्तरले हार बेहोर्नु परेको थियोे । खेलको म्यानअफ दी म्याच बिजेता टिमका २ गोल कर्ता जर्सि नं. ४ का खेलाडी सुरज उराउ घोषित भए । उनले म्यानअफ दी म्याचको मेडल र नगद २ हजार १ सय रुपैयाँ प्राप्त गरे । खेलको म्यान अफ दी म्याचको नगद राशी कनकाई ४ मा रहेको आरोही पोल्ट्री फमका संचालक अमित पोखरेलले प्रदान गरेका थिए ।
झापा जिल्लाका १५ पालिका मध्ये १२ पालिकाको सहभागिता रहेको प्रतियोगिताको बिजयी हुने टिमले नगद १ लाख १५ हजार तथा उपबिजयी हुने टिमले नगद ६१ हजार रुपैँया पाउने आयोजक समितिका अध्यक्ष छवि थपलियाले बताएका छन । प्रतिष्ठानका अध्यक्ष थपलियाको अध्यक्षता एवं कनकाई वडा नं.३ का वडाअध्यक्ष युवराज चम्लागाईँको प्रमुख आतिथ्य रहेको दोस्रो दिनको प्रतियोगितामा औपचारिक कार्यक्रमको संचालन प्रतिष्ठानका सचिव रामप्रसाद निरौलाले गरेका थिए ।
प्रतियोगितामा आईतबारको खेल शिवसताक्षी नगरपालिका र बुद्धशान्ती गाउँपालिका बिच हुने खेल संयोजक भुवन खतिवडाले जानकारी दिए ।
