कनकाई खबर \ झापाको कनकाईमा सम्पन्न स्थानीय तह स्तरीय अन्तर विद्यालय १५ औं राष्ट्रपति रनिङशिल्ड खेलकुद प्रतियोगिताको उपाधि आदर्श विद्यामन्दिर मावि घैलाडुवाले चुमेको छ ।
प्रतियोगितामा १० स्वर्ण, ८ रजत र ६ कास्य सहित २४ पदक प्राप्त गर्दै आदर्श विद्यामन्दिर मावि घैलाडुवाले उपाधि चुमेको हो । उपाधिसँगै आदर्श विद्यामन्दिरले मेडल र प्रमाण पत्र प्राप्त गरेको छ ।
कनकाई नगरपालिकाको शिक्षा, युवा तथा खेलकुद शाखा एवं कनकाई नगर खेलकुद विकास समितिले संचालन गरेको प्रतियोगितामा ८ स्वर्ण, ६ रजत र १० कास्य सहित २४ पदक प्राप्त गर्दै कनकाई मावि द्वितीय भएको छ । त्यस्तै ७ स्वर्ण, ५ रजत र ६ कास्य सहित १८ पदक प्राप्त गर्दै पशुपति अंग्रेजी मावि तृतीय भएको बताइएको छ ।
प्रतियोगितामा भृकुटी माविले ५ स्वर्ण, ८ रजत र ४ कास्य, फक्तालुङ एजुकेशन फाउण्डेसनले ५ स्वर्ण र ३ रजत, हरिकुल माविले ४ स्वर्ण र ५ कस्य, हिमाली माविले ३ स्वर्ण, ५ रजत र ४ कास्य , झापा मेरीगोल्डले ३ स्वर्ण, ३ रजत र ४ कास्य, चम्पापुर माविले २ स्वर्ण,३ रजत र ५ कास्य प्राप्त गरेको छ ।
त्यस्तै सिंहदेवी मावि २ स्वर्ण, १ रजत र ५ कास्य, सरस्वती माविले १ स्वर्ण, ४ रजत र ५ कास्य, ग्लोबल एडुकेयर एकाडेमी १ स्वर्ण, १ रजत र ३ कास्य, दिव्यरत्न अंग्रेजी मावि १ स्वर्ण, पाथिभारा अंग्रेजी मावि १ स्वर्ण, देवकोटा अंग्रेजी मावि १ स्वर्ण, विद्योदय अंग्रेजी मावि १ स्वर्ण, नवयुग अंग्रेजी मावि ३ कास्य, बेनुबाजा अंग्रेजी मावि १ रजत, प्यारागन एकाडेमी अंग्रेजी मावि १ कास्य पदक प्राप्त गर्न सफल भएको सरस्वती माविका शिक्षक मित्रजंग कार्कीले जानकारी दिए । प्रतियोगितामा एथलेटिक्स तर्फका विभिन्न खेलहरु, भलिबल, कबड्डी, तेक्वान्दो र कराँतेका खेलहरु संचालन भएको बताइएको छ ।
आदर्श विद्यामन्दिर मावि घैलाडुबामा तीन दिनसम्म संचालन भएको प्रतियोगिता नगर खेलकुद विकास समितिका अध्यक्ष जविन तिम्सिनाको अध्यक्षतामा सम्पन्न भएको हो । नगर क्षेत्रका निजी तथा सामुदायिक विद्यालयका २० वटा विद्यालयहरुको सहभागीता रहेको प्रतियोगिता समापन समारोहमा कनकाई नगरपालिकाका प्रमुख राजेन्द्रकुमार पोखरेलको प्रमुख आतिथ्य एवं उपप्रमुख आशा शिवाकोटीको विशिष्ट आतिथ्यमा सुक्रबार सम्पन्न भएको हो । नगरभित्रका विद्यार्थीहरूलाई खेलकुदप्रति आकर्षित गर्ने तथा उनीहरूलाई राष्ट्रिय तथा अन्तर्राष्ट्रिय स्तरका खेलमा अघि बढ्न प्रेरित गर्ने विश्वासका साथ प्रतियोगिता संचालन गरिएको नगर खेलकुद विकास समितिका अध्यक्ष तिम्सिनाले जानकारी दिए ।
प्रतियोगितालाई सहज रुपमा सम्पन्न गर्न विद्यालयको तर्फबाट महत्वपूर्ण भुमिका खेलेको भन्दै आदर्श विद्यामन्दिर माविलाई प्रशंसा पत्र प्रदान गरिएको थियो । आदर्श विद्यामन्दिर माविका प्रधानाध्यापक नरहरी न्यौपाने र कराँते तर्फका गुरु दुर्गा निरौलाले संयुक्त रुपमा संचालन गरेको समापन विशेष समारोहमा कनकाई नगरपालिकाका शिक्षा, युवा तथा खेलकुद शाखा प्रमुख राजकुमार ओडारी, कनकाई वडा नं.९ र वडा नं.२ का वडाअध्यक्ष क्रमशः राजेन्द्रप्रसाद उप्रेती र बलराम राई सहित अन्य जनप्रतिनिधिहरु,आदर्श विद्यामन्दिर व्यवस्थापन समितिका अध्यक्ष चन्द्रमोहन उप्रेती, समाजसेवी शेरवहादुर थापा, विभिन्न विद्यालयका प्रधानाध्यापकहरु सहित खेलप्रेमी व्यक्तित्वहरुको सहभागीता रहेको कार्यक्रम संयोजक नगर खेलकुद विकास समितिका उपाध्यक्ष गोविन्द उप्रेतीले जानकारी दिए ।