कनकाई खबर \ झापाको कनकाई वडा नं. ३ को कार्यालयले इन्टरनेट प्रदायक संस्थालाई स्थानीय तहमा जोडिन आग्रह गरेको छ ।
वडा कार्यालयले पटक–पटक गरेर इन्टरनेट, केवल तथा फोन प्रदायक संस्थालाई पत्राचार गरेर छलफलका लागि बोलाएपनि थोरै संख्यामा मात्र उपस्थित हुने गरेको भन्दै कडा चेतावनी दिइएको छ । यसरी पटक पटक जानकारी गराउँदा पनि अटेरी गरेमा कानुनी कार्वाहीको प्रक्रियामा अघि बढ्ने वडा अध्यक्ष युवराज चम्लागाईँले जानकारी गराएका छन् ।
स्थानीय सरकारले बोलाउँदा समेत अटेर गर्ने इन्टरनेट प्रदायक संस्थालाई वडा कार्यालयमा छलफलका लागि उपस्थित भएर सुचिकृत तथा दर्ता र केवल तार व्यवस्थापनका लागि कडा चेतावनी दिएको हो ।
कनकाई–३ का वडाध्यक्ष चम्लागाईले शुक्रवार इन्टरनेट, टेलिकम, केवलवालालाई अन्तर सम्वादका लागि पत्राचार गरेको बताए । ‘यो तेस्रो पटक पत्राचार गरेको हो’ वडाध्यक्ष चम्लागाईले भने ‘पटक–पटक गरेर सहकार्य र सहजताको लागि पत्राचार गर्दासमेत केही मात्र संस्थाको उपस्थिति छ ।’ यस अघि भएको छलफलमा ९ वटा इन्टरनेट प्रदायक संस्थाको उपस्थित भएपनि यस पटक चार वटाको मात्र उपस्थिति रहेको चम्लागाईँ बताउँछन् ।
वडाअध्यक्ष चम्लागाईँले कनकाई नगरस्थित सुरुङ्गा बजार क्षेत्रमा रहेका बिजुलीका पोलमा जथाभावी इन्टरनेट, केवल, टेलिफोन लगायतका तार अब्यवस्थित हुँदा आगलागी र सवारी दुर्घटना हुने भएकाले त्यसलाई ब्यवस्थित गराउने उदेश्यले सम्बन्धीत संस्थाहरुसँग अन्तर सम्वाद कार्यक्रमका लागि छलफल गर्न बोलाइएको बताए ।
पछिल्लो समय अव्यवस्थित तारका कारण आगलागीका घटना समेत भएको कनकाई नगरपालिकाकी कार्यपालिका सदस्य कृष्णमाया भुजेल बताउछिन् ।
१४ वढी इन्टरनेट प्रदायक संस्थालाई पत्राचार गरेपनि आजको छलफलमा फाइबर वर्ड कम्युनिकेशन, डिस होम, बर्डलिंक र नेपाल लिंक कम्युनिकेशनका प्रमुख तथा प्रतिनिधिको मात्रै उपस्थित रहेको बताइएको छ ।
वडा सदस्य गोविन्द सुवेदीले विद्युतीय पोलहरुमा टाँगिएका अव्यवस्थित तारले नगर क्षेत्रलाई कुरुप बनाउनुका साथै दुर्घटनाको जोखिम बढाएको भन्दै कनकाई सहित अन्य पालिकाले समेत यसको व्यवस्थापनमा जुट्नुपर्नेमा जोड दिए ।
वडा कार्यालयमा भएको अन्तर सम्वाद कार्यक्रममा इन्टरनेट प्रदायक संस्थाले माघ मसान्तसम्ममा वडामा सुचिकृत तथा दर्ता गर्नुपर्ने, पोलमा अब्यवस्थित रुपमा रहेका इन्टरनेटका केवल तथा तारहरु ब्यवस्थित गरी लिखित रुपमा वडा कार्यालयमा कार्य सम्पादन बारे जानकारी दिनु पर्ने निर्णय गरिएको छ ।
साथै उपस्थित नहुने इन्टरनेट प्रदायक संस्थालाई पुनः पत्राचार गर्ने र ती संस्थालाई पनि उक्त निर्णय कार्यन्वयन गराउने वडाअध्यक्ष चम्लागाईले बताए । छलफलमा उपस्थित इन्टरनेट प्रदायक संस्थाले उक्त निर्णय पालना गर्ने प्रतिवद्धतासमेत जनाएका छन् ।
कार्यक्रममा कार्यपालिका सदस्य कृष्णमाया भुजेल, वडा सदस्य सुश्मा परियार, वडासचिव कमल भण्डारी लगायतको उपस्थिति रहेको थियो ।
