कनकाई खबर \ झापाको मेचीनगर १३, चारालीस्थित त्रिदेव बहुमुखी क्याम्पसको प्रमुखमा बौद्धिक व्यक्तित्व गोपीकृष्ण भट्टराई नियुक्त भएका छन् ।
विश्वविद्यालय अनुदान आयोग नेपालबाट क्यु.ए.ए. प्राप्त पूर्वक्षेत्रकै एक प्रसिद्ध शैक्षिक प्रतिष्ठान त्रिदेव बहुमुखी क्याम्पस चारआलीको क्याम्पस प्रमुखमा नियुक्त भट्टराई यसै क्याम्पसका संस्थापक शिक्षक साथै दाता समेत हुन् ।
क्याम्पस सञ्चालक समितिको शुक्रवार सम्पन्न बैठकले भट्टराईलाई आगामी चार वर्षका लागि क्याम्पस प्रमुख नियुक्त गरेको समितिका अध्यक्ष हरि घिमिरेले जानकारी दिए । संघर्ष र अनुभवले खारिएका बौद्धिक व्यक्तित्व भट्टराईले माघ ६ गते आइतबारदेखी आफ्नो जिम्मेवारी सम्हालेका छन् ।
कनकाई मावि सुरुङ्गाका पूर्व प्रअ, नेपाल राष्ट्रिय शिक्षक संगठन कनकाई नगर समितिका निवर्तमान अध्यक्ष तथा हाल संगठनका कोशी प्रदेश प्रतिनिधि समेतको जिम्मेवारीमा रहेका भट्टराई मानवअधिकारकर्मी, विद्यार्थीमाझ लोकप्रिय प्राध्यापकका रुपमा परिचित छन् । वौद्धिक व्यक्तित्व भट्टराईले वि.सं. २०६५ सालदेखि १२ बर्षसम्म कन्काई बहुमुखी क्याम्पसमा स्नातकोत्तर तहको शिक्षण अनुभव प्राप्त गरेका छन् ।
यसअघि त्रिदेव क्याम्पसमा माधव प्याकुरेल क्याम्पस प्रमुखको जिम्मेवारीमा रहेका थिए । स्थापना कालदेखिकै क्याम्पस प्रमुख प्याकुरेलले दुई महिना अघि नै स्वेच्छिक अवकाश लिएपछि सहायक क्याम्पस प्रमुख तेजप्रसाद खनालले निमित्त क्याम्पस प्रमुखको जिम्मेवारी सम्हाल्दै आएका थिए ।
पिता मनप्रसाद र माता गोमादेवी भट्टराईका कान्छा सुपुत्रका रूपमा २०२३ सालमा जन्मीएका गोपीकृष्ण भट्टराईको बाल्यकालको आफ्नै संघर्षमय कथा छ । जन्मीएको छ महिनामै बुबाको निधन भएपछि विकट पहाडी क्षेत्रमा २३ वर्षको उमेरमै एकल जीवन बिताउँन बाध्य भएकी आमा र फुपू दिदीहरुको रेखदेखमा हुर्किएका भट्टराई अत्यन्तै संघर्षशिल व्यक्तित्वका रुपमा परिचित छन् ।
आफ्नै संघर्ष र दुःखले पढ्दै पाँचथरको सुवाङ विद्यालय, इलामको महेन्द्र बहुमुखी क्याम्पसबाट आई.एड.तह र काठमाण्डौ कीर्तिपुरबाट स्नातकोत्तर तहको अध्ययन पूरा गरेका भट्टराईले २०४७ माघदेखि कीर्तिपुरको बाघभैरव इङ्लिस बोर्डिङ स्कुलबाट शिक्षण पेशा सुरु गरेका हुन् । वि.सं. २०५६ देखि ६१ सालसम्म इलामको महेन्द्ररत्न क्याम्पसमा समेत शिक्षण गरेका भट्टराईले आफ्नो व्यवहारिक कारणले झापा बसाई सरेसँगै इलाम क्याम्पसको जागिर छोडेर माध्यमिक तहको शिक्षक साथै कन्काई माविको प्रधानाध्यापकको जिम्मेवारी र अनुभव समेत प्राप्त गरेका छन् ।