कनकाई खबर \ झापाको बिर्तामोड ̶ २ चारपानेमा मुख्य कार्यालय रहेको सहारा नेपाल साकोसले २८औं वार्षिक साधारण सभा अन्तर्गत एकाईगत साधारण सभा सुरु गरेको छ ।
यसै क्रममा सोमबार र मंगलबार कनकाई उद्योग वाणिज्य संघको सभा हलमा सुरुङ्गा सेवा केन्द्रको एकाईगत साधारण सभा सम्पन्न भएको छ । सेवा केन्द्रका संयोजक निर्मल दहालको अध्यक्षता एवं कनकाई वडा नं.४ का वडाअध्यक्ष रोशन सुवेदीको प्रमुख आतिथ्य रहेको सभा सोमबार सम्पन्न भएको हो ।
कार्यक्रमका प्रमुख अतिथि वडाअध्यक्ष सुवेदीले वित्तिय कारोबारसँगै विकास निर्माण, शिक्षा, स्वास्थ्य, कृषि लगायतका क्षेत्रमा स्थानीय सरकारसँग सहकार्य गर्दै आएको सहारा नेपाल विपन्न परिवार एवं समुदायका लागि एउटा विश्वासिलो सारथी बनेको भन्दै संस्थाको थप सफलताको कामना गरे ।
अन्य सहकारी संस्थाहरुको तुलनामा अब्बल संस्थाको रुपमा स्थापित सहारा साकोसले युवाहरुलाई स्वदेशमै आत्मनिर्भर हुन सक्ने युवा लक्षित कार्यक्रमलाई थप सशक्त बनाउँदै अघि बढ्न वडाअध्यक्ष सुवेदीले सुझाव दिए ।
एकाईगत साधारणसभामा अध्यक्षको प्रतिबेदन प्रस्तुत गर्दै संस्थाका प्रथम उपाध्यक्ष छविलाल खतिवडाले आर्थिक वर्ष २०८०\०८१ असार मसान्त सम्मको वित्तीय विवरण प्रस्तुत गर्दै संस्थाको कुल पुँजी तथा दायित्व १६ अरब, ८३ करोड,३३ लाख, ३६ हजार ४१० रहेको जानकारी दिए । त्यस्तै १ अरब, ६७ करोड, ८६ लाख, १२ हजार ७०० शेयर पूँजी रहेको संस्थामा १२ अरब, ७५ करोड,३७ लाख, ६३ हजार, २०८ निक्षेप रहेको बताइएको छ ।
साधारण सभामा संस्थाको नीति तथा कार्यक्रम संचालक सदस्य शंकर रिजालले साथै लेखापरीक्षणको प्रतिबेदन संस्थाका सहायक निर्देशक ईश्वरप्रसाद भट्टराईले प्रस्तुत गरेका थिए । त्यस्तै ईलाका कार्यालय प्रमुख चुडामणि कट्टेलले लेखा सुपरिवेक्षण समिति तथा ऋण समितिको प्रतिबेदन प्रस्तुत गरेका थिए । सेवा केन्द्र सदस्य रामबहादुर भुजेलले स्वागत तथा सदस्य रुपनारायण खतिवडाले सञ्चालन गरेको सभाबाट ३ जना अन्तिम माइन्युट प्रमाणित गर्न र १७ जना प्रतिवेदन प्रमाणित गर्ने प्रतिनिधिहरु सर्वसम्मत छनौट भएको बताइएको छ ।
त्यस्तै मंगलबार सेवा केन्द्र संयोजक दहालकै अध्यक्षतामा भएको दोस्रो दिनको एकाईगत साधारण सभा कनकाई वडा नं.३ का वडाअध्यक्ष युवराज चम्लागाईँको प्रमुख आतिथ्यमा सम्पन्न भएको हो ।
कार्यक्रमलाई सम्बोधन गर्दै प्रमुख अतिथी वडाअध्यक्ष चम्लागाईँले स्थानीय सरकारसँगको सहकार्यमा सहाराले गरेका गतिविधिहरु सबैले देख्न र अनुभव गर्न सकिने भएको भन्दै समाज रुपान्तरणमा सहाराको भूमिका अब्बल रहेको बताए ।
संचालक सदस्य लक्ष्मीप्रसाद आचार्यले अध्यक्षको प्रतिवेदन, संस्थाका उपनिर्देशक दिनेशबहादुर निरौलाले नीति तथा कार्यक्रम साथै ईलाका कार्यालय प्रमुख चुडामणि कट्टेलले लेखा सुपरिवेक्षण समिति तथा ऋण समितिको प्रतिबेदन प्रस्तुत गरेका थिए । सबै प्रतिवेदन सहित संस्थाको सेवाका विषयमा सभामा सदस्यहरुबाट उठेका सवालको जवाफ संस्थाका उपनिर्देशक दिनेशबहादुर निरौलाले दिएका थिए।
सेवा केन्द्र सदस्य रामबहादुर भुजेलले स्वागत तथा सदस्य चन्द्रकला सिटौलाले सञ्चालन गरेको सभाबाट ३ जना अन्तिम माइन्युट प्रमाणित गर्न र १७ जना प्रतिवेदन प्रमाणित गर्ने प्रतिनिधिहरु सर्वसम्मत छनौट भएको सेवा केन्द्र प्रमुख टिका प्रधानले जानकारी दिए ।
संस्थाले साधारण सभा प्रयोजनका लागि कुल ७ वटा एकाई अन्तरगत ८६ वटा उप एकाईमा विभाजन गरी कार्यक्रम संचालन गर्दै आएको बताइएको छ ।