कनकाई खबर \ नेपाल हृदय रोग निवारण प्रतिष्ठान (हार्ट फाउण्डेशन) को केन्द्रीय सभा झापामा हुने भएको छ । केन्द्रको ३३औँ केन्द्रीय सभा पुष १३ र १४ गते झापा शाखाको आतिथ्यमा बिर्तामोडस्थित अग्रसेन भवनमा हुन लागेको हो ।
आतिथ्य शाखा झापाले पत्रकार सम्मेलनको आयोजना गरि यो बर्षको सभा झापामा हुन लागेको र सम्पूर्ण तयारी पूरा भएको जनाएको छ ।
केन्द्रले मुटु रोग सम्बन्धि सचेतना जगाउने र यसको उपचारको लागि वकालत गर्दै आएको प्रतिष्ठानको केन्द्रीय समितिका निवर्तमान अध्यक्ष बलराम न्यौपानेले जानकारी दिए । केन्द्र र यसका गतिविधीको प्रचारका लागि मोफसलमा केन्द्रीय सभा गर्न थालिएको र अघिल्लो बर्ष अधिवेशन सहितको केन्द्रीय सभा ललितपुरको जावला खेलमा गरिएको पूर्वअध्यक्ष डिल्लीराम घिमिरेले बताए ।
डा.मेगेन्द्रराज पाण्डेको अगुवाईमा २०४५ सालमा स्थापना भएको केन्द्रले ५९ जिल्लामा शाखा र बाँकी अन्य जिल्लाहरुमा तदर्थ समिति विस्तार गरिसकेको पूर्वअध्यक्ष घिमिरेले जानकारी दिए । केन्द्रले मुटुका बिरामीहरुको उपचारका लागि आर्थिक सहयोग गर्नुका साथै शहिद गंगालाल हृदय रोग केन्द्र र अन्य सहयोगी संस्थाहरुसँग समन्वय गरिदिने गरेको पनि घिमिरेले बताए ।
केन्द्रमा स्थापित कोषको रकमबाट उत्कृष्ट कार्य सम्पादन गर्ने शाखाहरुलाई पुरस्कृत गर्दै आएको निवर्तमान अध्यक्ष न्यौपानेले जानकारी दिए । गत बर्ष झापाको कनकाई नगरपालिकाले नगर क्षेत्रभित्र सूर्तीजन्य पदार्थ बिक्री वितरण र सेवनमा रोक लगाएको कारण पालिकालाई सम्मान समेत गरेको थियो ।
कार्यक्रमको अवधीमा स्वयम् सेविकाहरुलाई प्राविधिक तालिम दिनुका साथै बिएण्डसी अस्पतालबाट प्रभातफेरी निकाल्ने आदि कार्यक्रम रहेको केन्द्रका झापा अध्यक्ष सन्तोष अग्रवालले जानकारी दिए । कार्यक्रमको पुष १३ गते शनिबार दिउँसो साढे तीन बजे प्रतिष्ठानका केन्द्रीय अध्यक्ष डा.सत्यनारायण सुवाल, फाउण्डेशनका पुर्वअध्यक्षहरु सहित विभिन्न जिम्मेवारीमा रहेका अग्रज व्यक्तित्वहरु, जिल्ला शाखाका प्रमुखहरुको उपस्थितीमा विर्तामोड नगरपालिकाका प्रमुख पवित्रा महतरा प्रसाईँले सभाको उद्घाटन गर्ने झापा शाखाका सहसचिव राम निरौलाले बताए ।
पत्रकार सम्मेलनमा प्रतिष्ठान स्थापनाको उद्येश्य सहित सहभागीहरुलाई झापा शखाका निवर्तमान अध्यक्ष कुमारमणि पोखरेलले स्वागत गरेका थिए ।
