कनकाई खबर \ झापाको सुरुङ्गामा एक विशेष कार्यक्रमका बीच विश्व ध्यान दिवस मनाइएको छ ।
कनकाई ३ सुरुङ्गा स्थित ब्रम्हकुमारी राजयोग सेवा केन्द्रले आयोजना गरेको कार्यक्रममा सहभागीहरुले आत्मा र परमात्मालाई चिन्ने एउटा महत्वपूर्ण माध्यम ध्यान रहेको बताएका छन् । राजयोग सेवा केन्द्र सुरुङ्गाकी प्रमुख ब्रम्हकुमारी पार्वती दिदीको अध्यक्षता एवं कनकाई नगरपालिकाका प्रमुख राजेन्द्रकुमार पोखरेलको प्रमुख आतिथ्य रहेको ध्यान दिवस विशेष कार्यक्रमलाई सम्बोधन गर्दै नगर प्रमुख पोखरेलले अहिलेको व्यस्त जीवनशैली व्यवस्थापनमा ध्यानको अत्यन्तै महत्व रहेको बताएका छन् ।
मानव जीवनमा मानसिक स्वास्थ्य र आन्तरिक शान्तिका लागि ध्यानको अति नै महत्व रहेको भन्दै नगर प्रमुख पोखरेलले तनाव व्यवस्थापन, आत्मचिन्तन र सकारात्मक जीवनशैलीलाई प्रोत्साहन दिन ध्यानको अति नै आवश्यक रहेको बताए । संयुक्त राष्ट्रसङ्घले घोषणा गरेको विश्व ध्यान दिवसको अवसरमा नेपालमा पनि विभिन्न धार्मिक, आध्यात्मिक, सांस्कृतिक एवम् सामाजिक संघ संस्थाले ध्यान शिवरि संचालनमा ल्याएको बताइएको छ ।
संयुक्त राष्ट्रसङ्घले डिसेम्बर २१ गते अर्थात आज पौष ६ गतेका दिन पहिलो विश्व ध्यान दिवस मनाउने घोषणा गरे अनुसार नेपालमा पनि विभिन्न कार्यक्रम सम्पन्न भएको बताइएको छ । संयुक्त राष्ट्रसङ्घको महासभाले योग र ध्यानलाई स्वास्थ्यका लागि पूरक उपायका रूपमा स्वीकार गर्दै ध्यान दिवस मनाउने निर्णय गरेको हो । मस्तिष्कलाई तनावमुक्त गर्न र आराम दिनका लागि ध्यान उचित प्रक्रिया र विधि मानिन्छ ।
प्राचीनकालमा आश्रममा बस्ने ऋषिमुनि र योगीहरूले अभ्यास गरे पनि पछिल्लो समय जीवन विज्ञान, विपश्यना, ओमशान्ति, पतञ्जली लगायतले शान्त र आरोग्य जीवन अपनाउन सकिने गरी जनमानसमा ध्यानको अभ्यास गराउँदै आएको बताइएको छ ।यसबाट शान्तिको निरन्तर लहर पृथ्वीभर फैलने विश्वास गरिएको छ ।
ब्रम्हकुमारी अशोका दिदीले संचालन गरेको औपचारिक कार्यक्रममा कनकाई वडा नं.३ का वडाअध्यक्ष युवराज चम्लागाईँ, वडा नं. ६ का वडाअध्यक्ष लक्ष्मीप्रसाद ओली, कार्यपालिका सदस्य कृष्णमाया भुजेल, वडा नं.९का पुर्व वडाअध्यक्ष प्रेमप्रसाद राजवंशी , समाजसेवीहरु
खड्ग प्रसाईँ र रविन्द्र लम्साल, पत्रकार रामप्रसाद निरौला लगायतले कार्यक्रमको पूर्ण सफलताको कामना गर्दै ध्यानको माध्यमबाट परिवार र समाज रुपान्तरणमा हत्वपूर्ण भूमिका खेल्न सकिने बताएका छन् ।
