कनकाई खबर \ यही मंसिर १६ गते हुने स्थानीय तह उपनिर्वाचनमा झापाको कनकाई वडा नं. ६ मा वडाअध्यक्ष पदका लागि ९ जना उम्मेद्वारको अन्तिम नामावली प्रकाशनसँगै उम्मेद्वारलाई निर्वाचन चिन्ह प्रदान गरिएको छ ।
कनकाईको वडा नंं.६,चम्पापुरस्थित वडा कार्यालयमा रहेको मुख्य निर्वाचन अधिकृतको कार्यालय परिसरमा एक संक्षिप्त कार्यक्रमको आयोजना गरी निर्वाचन आयोगले उम्मेद्वारको अन्तिम नामावली प्रकाशनसँगै उम्मेद्वारलाई निर्वाचन चिन्ह प्रदान गरेको हो । सोही अवसरमा स्वतन्त्र सहित उम्मेद्वारी मनोनयन गरेका मुख्य राजनीतिक दलका प्रमुख साथै प्रतिनिधिहरुको उपस्थितीमा आयोगले निर्वाचन आचार संहिताको पालना गर्ने विषयमा समेत जानकारी गराएको थियो \
निर्वाचन आयोगले वडाअध्यक्ष पदका लागि नेकपा एमालेका उम्मेद्वार तुलाराम बस्नेतलाई चुनाव चिन्ह सूर्य, नेपाली कांग्रेसका रामगोपाल ओलीलाई रुख, माओवादी केन्द्रका गणेश थापालाई गोलाकारभित्र हँसिया हतौडा, राप्रपाका नारायणप्रसाद निरौलालाई हलो, संघीय लोकतान्त्रीक राष्ट्रिय मंचका दलबहादुर श्रेष्ठलाई दाप सहितको खुकुरी, मंगोल नेशनल अर्गनाइजेशनका उम्मेद्वार पदमबहादुर तामाङ्गलाई कुखुराको भाले, जनमत पार्टीका शुकलाल राजवंशीलाई लाउड स्पिकर र नागरिक उन्मुक्ति पार्टीका जमुना राजवंशीलाई पिध भएको सादा ढकिया सहित स्वतन्त्रका उम्मेद्वार लक्ष्मीप्रसाद ओलीलाई चुनाव चिन्ह चापाकल प्रदान गरेको जिल्ला निर्वाचन अधिकृत तुलसी नेपालले जानकारी दिए । सोही अवसरमा निर्वाचन अधिकृत नेपालले निर्वाचन प्रयोजनका लागि आचार संहिताका विषयमा विस्तृत जानकारी गराएका थिए ।
मुख्य निर्वाचन अधिकृत उमेशप्रसाद लुइँटेलले निर्वाचनलाई धेरै भद्धा नबनाइकन शान्तीपूर्ण रुपमा सम्पन्न गर्न सम्बन्धित सबैले स्वामित्व लिनु पर्नेमा जोड दिए । स्वच्छ, निष्पक्ष र भयरहित वातावरणमा निर्वाचन सम्पन्न गर्न निर्वाचन आयोगले तोकेको आचार संहिता पालना गर्नु पर्नेमा मुख्य निर्वाचन अधिकृत लुइँटेलले थप प्रष्ट पारे । अधिकृत लुइटेलले चुनाव प्रचारका लागि यहि मंसिर ६ गतेदेखी १३ गते सम्म बिहान ७ बजेदेखी बेलुका ७ बजे सम्मलाई समय निर्धारण गरेको जानकारी दिए ।
उपनिर्वाचनका लागि कनकाई ६ मा दुई हजार ५८ मतदाता रहेका छन् । मतदानको समय मंसिर १६ गते चम्पापुर माविको परिसरमा तय गरेको निर्वाचन कार्यालयले जानकारी दिएको छ । एमालेवाट निर्वाचित वडाअध्यक्ष दीर्घबहादुर थापाको क्यान्सर रोगका कारण निधनपछि उक्त पदका लागि उपनिर्वाचन हुन लागेको हो ।