कनकाई खबर \ राष्ट्रिय स्वतन्त्र पार्टी झापाले कात्तिक १४ गते बुधबार १ बजे सुरुङ्गामा बिरोध प्रदर्शन गर्ने भएको छ ।
पार्टी सभापति रवि लामिछानेलाई प्रतिशोध साँधेर पक्राउ गरिएको बताउँदै आएको रास्वपाले बुधबार सुरुङ्गामा प्रदर्शन गर्न लागेको हो ।सहकारी ठगी प्रकरणमा लामिछानेलाई कात्तिक २ गते काठमाडौंबाट पक्राउ गरिएको थियो ।
संसदीय छानविन समितिले सहकारी ठगीमा सभापति लामिछानेको कुनै संलग्नता नभएको भनेतापनि सरकारले राजनीतिक प्रतिशोध साँधेर कानुनको दुरुपयोग गरी झुटो मुद्दामा पक्राउ गरेका कारण बिरोध प्रदर्शन गरिने रास्वपाले जनाएको छ ।
प्रदर्शन व्यक्ति केन्द्रित नभइ, भ्रष्टाचार बिरुद्धको र वास्तविक सहकारी ठगलाई कारबाही गरी सहकारी पीडितको रकम फिर्ता गर्न र देशलाई गरिब र बदनाम बनाउने सबै भ्रष्टाचारका काण्डहरुको छानविन गरी दोषीलाई कारबाही गर्न सरकारलाई दबाब दिने उद्देश्यले विरोध कार्यक्रमको तयारी गरेको रास्वपाका नेता शम्भु सुस्केराले जनाएका छन् ।कार्यक्रममा स्वतन्त्र नागरिक समाज र राष्ट्रिय स्वतन्त्र पार्टीका शुभेच्छुकहरुको समेत सहभागिता हुने रास्वपाका नेता ढकाल बताउँछन् ।
