कनकाई खबर \ झापाको कनकाई—३,सुरुङ्गास्थित कनकाई माविको खेल मैदानमा प्रथम वडास्तरीय दशैं तिहार कप फुटबल प्रतियोगिता संचालन भएको छ ।
सुरुङ्गास्थित होटल डिलाइटलको आयोजना एवं हाल अमेरीका बस्दै आएका खेलप्रेमी स्थानीय युवा आशिष संग्रौला, अमेरीकास्थित नेप्लीज मिल्ट्री भेट्रान्स क्लव र दारी क्लव युएसएको मुख्य प्रायोजनमा प्रतियोगिता संचालन भएको हो । कनकाई वडा नं. ३ र वडा नं.७ बीच भएको प्रतियोगिताको उद्घाटन खेलमा वडा नं. ३ ले जित हासिल गरेको छ ।
डा नंं.३ ले वडा नंं.७ लाई ३—१ गोल अन्तरले पराजित गरेको हो । बिजयी टिम ३ नम्बरका लागि खेलको पहिलो हाफमा सबै गोल सम्भव भएको हो ।जसमा खेलको १९ मिनेटमा रोहन कार्कीले गोल गर्दै टिमलाई अग्रता दिलाएका हुन् । क्रमिक रुपले खेलको २१ मिनेटमा अरुण श्रेष्ठले र २४ मिनेटमा क्षितिज कुवँरले गोल गरेका थिए । यता वडानम्बर ७ का खेलाडी अमुल्य लिम्बुले भने खेलको ३१ औ मिनेटमा गोल गरेपनि टिमको हारलाई भने टार्न सकेनन् ।
कनकाई ३ दोस्रो हाफमा एक खेलाडीले दोहोरो एलो कार्ड खाँदै मैदान बाहिरीदा कनकाई ३ का १० खेलाडीमा सिमित हुन पुगेको थियो । तर वडा नं. ७ ले यसको फाइदा उठाउन भने सकेनन् ।खेलको म्यान अफ द म्याच बिजयी टिमका खेलाडी क्षितिज कुँवर घोषित भए । उनलाई आयोजक संस्था होटल डिलाइटका संचालक ख्याम ओली, मुख्य प्रायोजक आशिस संग्रौला लगायतले नगद १५ सय सहित पुरस्कृत गरे । उनी भारतीय टिम राजस्थान रोयल्सबाट व्यावसायिक फुटबल समेत खेलिरहेका छन् । विजेता बनेको कनकाई वडा नं.३ राष्ट्रिय खेलाडी रोहन कार्की सहित खेल मैदानमा उत्रिएको थियो ।
कनकाई माविको खेल मैदानमा आज कार्तिक ९ गतेदेखि संचालन भएको प्रतियोगिताको भोली शनिवार २ खेलहरु हुनेछन । पहिलो खेल कनकाई ९ र वडा नं. १ बीच दिउँसो १ बजे र दोस्रो खेल वडा नं. ८ र ४ बिच दिउँसो ३ बजे हुने आयोजक समितिका खेल संयोजक दिपेन ओलीले जानकारी दिए ।
प्रतियोगिताको उद्घाटन संघिय सांसद एलपी साँवा लिम्बुले गरेका थिए । साँवाले विदेशमा रहेर पनि खेल क्षेत्रको विकासका लागि यहाँका सचेत युवाले पहल गरेको भन्दै प्रसंसा गरे । कार्यक्रमको औचित्यमाथि प्रकाश पार्दै कार्यक्रम संयोजक दिपेन ओलीले यस क्षेत्रका खेलप्रेमी जनताको भावनालाई मर्न नदिन फुटबल खेलको आयोजना गरिएको बताए । कार्तिक १४ गतेसम्म संचालन हुने फुटबल प्रतियोगिताको बिजेताले नगद ७१ हजार, मेडल र प्रमाण पत्र साथै दोस्रो हुने टिमले नगद ३५ हजार, मेडल र प्रमाण पत्र प्राप्त गर्नेछ ।
प्रतियोगितामा कनकाई नगरपालिकाको ९ वटा वडाको ९टिम र कनकाई भेट्रान्सको एक टिम गरी १० वटा टिमको सहभागीता रहेको बताइएको छ ।
कनकाई माविको खेल मैदानमा संचालन भएको प्रतियोगिताको उद्घाटन खेल अघि कनकाई नगर क्षेत्रका पत्रकारहरुको संस्था कनकाई सुरुङ्गा प्रेस क्लव र कनकाई भेट्रान्स वीच भएको मैत्रीपुर्ण खेलमा कनकाई भेट्रान्स बिजयी बनेको थियो । कार्यक्रमकै अवसरमा आयोजकका तर्फबाट कनकाई भेट्रान्स क्लवका खेलाडीलाई आवश्यक पर्ने जर्सी हस्तान्तरण गरेको बताइएको छ ।
