कनकाई खबर \ झापाको सुरुङ्गामा वडास्तरीय फुटबल प्रतियोगिता संचालन हुने भएको छ ।
कनकाईको खेलकुद विकासमा थप सहयोग पुर्याउँने उद्येश्यका साथ सुरुङ्गास्थित होटल डिलाइटले आगामी कार्तिक ९ देखि १४ सम्म प्रथम वडास्तरीय दशैं तिहार कप (नकआउट) फुटबल प्रतियोगिता संचालन गर्ने भएको हो । प्रतियोगिताको मुख्य प्रायोजक हाल अमेरीका बस्दै आएका खेलप्रेमी स्थानीय युवा आशिष संग्रौला, अमेरीकास्थित नेप्लीज मिल्ट्री भेट्रान्स क्लव र दारी क्लव युएसए रहेको बताइएको छ । त्यस्तै प्रायोजकका रुपमा युएसए आर्मी नविन सुवेदी सहित बद्री संग्रौला, आकाश संग्रौला, ओजिस उप्रेती, क्रिस्टल कडेँल, योगेश आचार्य र संदिप वास्तोला रहेका छन् ।
सुरुङ्गामा पत्रकार सम्मेलनको आयोजना गर्दै प्रतियोगिताको तयारी अन्तिम चरणमा पुगेको जानकारी गराइएको छ । प्रतियोगितामा कनकाई नगरपालिकाको ९ वटा वडाबाट एक\ एक टिम र कनकाई भेट्रान क्लवको एउटा टिमले सहभागिता जनाउँने आयोजक समिति होटल डिलाइटका सञ्चालक ख्याम ओलीले जानकारी दिए । प्रतियोगितामा प्रथम हुने टिमले नगद ७१ हजार र दोस्रो हुने टिमले नगद ३५ हजार रुपैँया प्राप्त गर्दा विधागत उत्कृष्ट खेलाडीहरुले समेत जनही ५ हजार रुपैँया नगद प्राप्त गर्ने बताइएको छ । पुरस्कार राशी कनकाईको वडास्तरीय प्रतियोगिताको हाल सम्मकै सबैभन्दा बढी रकम हो ।
पत्रकार सम्मेलनमा खेल संयोजक दिपेन ओली, आयोजक होटल डिलाइटका संचालक ख्याम ओली सहित पुर्व युएस आर्मीका आशिस संग्रौला, सहयोगी युएस आर्मी नविन सुवेदी लगायातले पत्रकारले सोधेको प्रश्नको जवाफ दिँदै प्रतियोगितामा करिव साढे ६ लाख रुपैँयाको बजेट खर्च हुन सक्ने जानकारी गराइयो । प्रतियोगिताका लागि आवश्यक पर्ने रकम कुनै सरकारी निकाय वा संघ संस्थासँग सहयोग नमागिएको आयोजकले बताएको छ । आगामी बर्षमा समेत कुनै संघ संस्थाले चाड पर्वमा प्रतियोगिता नगराएमा हरेक बर्ष आँफूहरुले निजी लगानीमै कनकाई माविको खेल मैदानमा फुटबल खेलाउने आयोजक समितिले जनाएको छ ।
प्रतियोगिताको उद्घाटनमा कनकाई नगर क्षेत्रका पत्रकारहरुको संस्था कनकाई सुरुङ्गा प्रेस क्लव र आयोजक बीच मैत्रीपूर्ण खेल संचालन हुने बताइएको छ । संघीय सांसद एलपी साँवाबाट उद्घाटन हुने विशेष समारोहमा पहिलो दिनको उद्घाटन खेल वडानम्बर ३ र ७ बीच हुने आयोजक समितिका खेल संयोजक दिपेन ओलीले जानकारी दिए ।
कनकाई माविको खेल मैदानमा सम्पन्न हुने उद्घाटन विशेष समारोहका अवसरमा राष्ट्रिय फुटबल खेलाडी स्थानीय रोहन कार्की र सिम्रन राईलाई नगद सहित सम्मान गर्ने कार्यक्रम रहेको आयोजक होटल डिलाइटका संचालक ख्याम ओलीले जानकारी दिए ।
