कनकाई खबर \ अबिरल बर्षाका कारण विस्थापित बन्न पुगेका कनकाईको वडा नंं.६ का केही परिवारलाई राहत सामाग्री वितरण गरिएको छ ।
सुरुङ्गा खोलामा आएको भीषण बाढीले खोलाको पूर्वी किनाराको बाँध भत्कन गई कनकाई— ६ को मातृ–बिमली टोलमा बिपद्को अवस्था सिर्जना भएकाले विस्थापित परिवारलाई राहत सामाग्री वितरण गरिएको हो । शुक्रबार बेलुका वडास्थित गायत्री मन्दिर सामुदायिक भवनमा बसोबासको व्यवस्था मिलाएर उद्धार गरिएका वडाबासीलाई कनकाई —६ का पूर्व वडाअध्यक्ष लक्ष्मीप्रसाद ओलीको नेतृत्वमा अतिआवश्यकीय खाद्य सामाग्री वितरण गरिएको वडा कार्यालयका कर्मचारी फणिन्द्र गिरीले जानकारी दिए । समाजसेवी पूर्व वडाअध्यक्ष ओली सहित श्री जी मिडिया प्रा.लि.का नवलशरण बिहारी महाराजको तर्फबाट प्राप्त चामल, दाल, तेल, नून, सोयाबिन, आलु, प्याज, खोर्सानी, चिउरा लगायतका खाद्य सामाग्री बितरण गरिएको बताइएको छ। वडाबासीलाई कुनैपनि समय आपतबिपद आइपर्यो भने अप्ठ्यारो नमानी सोझै आँफूलाई सम्पर्क गर्न पुर्व वडाअध्यक्ष ओलीले वडाबासी सबैमा अनुरोध गरेका छन् ।
हाल वर्षा केही कम भएकाले पानीको सतह घटेका कारण विस्थापित परिवारलाई आफ्नै घरमा व्यवस्थापन गरिएको बताइएको छ । विपदका समयमा वडाका जनप्रतिनिधिका तर्फबाट वडासदस्य अर्जुन राजवंशी सहित पुर्व वडाअध्यक्ष ओलीको महत्वपूर्ण भूमिका रहेको कनकाई वडा नं.६ स्थित वडा कार्यालले जनाएको छ । निरन्तर वर्षा भइरहेका कारण अझै पनि विपद्को अवस्था सिर्जना हुन सक्ने भएकाले कुनै पनि समयमा आपतविपद पर्न गएमा वडाका जनप्रतिनिधि अथवा वडाका कर्मचारीहरुलाई तत्काल जानकारी गराउँन अनुरोध गर्दै सहयोगी मनहरु सबैप्रति वडा कार्यालयका तर्फबाट कर्मचारी गिरीले धन्यवाद ज्ञापन गरेका छन् ।
