कनकाई खबर \ संविधान दिवसको अवसरमा विहिबार साँझ कनकाई नगर क्षेत्रका चोक बजार सहित विभिन्न क्षेत्रमा दीप प्रज्वलन गरिएको छ ।
कनकाईका मुख्य बजार सुरुङ्गा, दुर्गापुर, लक्ष्मीपुर, घैलाडुवा लगायत अन्य विभिन्न चोक बजार सहित नगर क्षेत्रका विद्यालयमा समेत दीप प्रज्वलन गरिएको बताइएको छ । मैनबत्तीबाट नेपालको नक्सा बनाएर दिप प्रज्वलन गर्दै संविधान दिवसलाई राष्ट्रिय दिवसका रुपमा मनाइएको हो ।
यसै अवसरमा कनकाई—२ स्थित जानकी आधारभुत विद्यालयको स्काउट दलले समेत दिप प्रज्वलन गरेको छ । विद्यालयकी प्र.अ.इन्दिरादेवी पाठकको अध्यक्षता एवं कनकाई वडा नं.२ का वडाअध्यक्ष बलराम राईको प्रमुख आतिथ्यमा दिप प्रज्वलन कार्यक्रम सम्पन्न भएको हो ।
कार्यक्रमलाई सम्बोधन गर्दै प्रमुख अतिथी वडाअध्यक्ष राईले नेपाली जनताको लामो समयको प्रतिक्षा,त्याग र बलिदानबाट प्राप्त नेपालको संविधान २०७२ ले सबै नेपालीलाई पहिचान दिएको बताए । यहि संविधानको जगमा टेकेर ३ तहको निर्वाचन सम्पन्न भइ कार्यान्वयन समेत भएको भन्दै वडाअध्यक्ष राईले संविधान दिवसको अवरमा सबैलाई शुभकामना व्यक्त गरे । कार्यक्रममा मेचीनगर नगरपलिका स्काउट परिषदका सदस्य तथा स्काउट शिक्षक दिपक बग्दासले कार्यक्रम सफलताको शुभकामना मन्तव्य राखेका थिए ।
दिप प्रज्वलन कार्यक्रममा विद्यालयका स्काउट दलको स्काउट शिक्षक द्वय अरुन नेपाल र सीता थपलिया सहित विद्यालयका शिक्षक, अभिभावक, विभिन्न संघसंस्थाका प्रमुख तथा प्रतिनिधि लगायत स्थानीयबासीको उल्लेख्य सहभागीता रहेको विद्यालयकी प्रअ इन्दिरा पाठकले जानकारी दिएकी छन् । औपचारिक कार्यक्रमको संचालन जानकी स्काउट ट्रूप लिडर न्युकृति खड्काबाट भएको बताइएको छ ।
