कनकाई खबर\ दशौं संविधान दिवसको अवसर पारेर कनकाई नगरपालिकाले झण्डोत्तोलन सहित विशेष कार्यक्रम सम्पन्न गरेको छ ।
नगरपालिका परिसरमा सम्पन्न कार्यक्रममा नगर प्रहरीहरुबाट सलामी अर्पण सहित नगर प्रमुख राजेन्द्रकुमार पोखरेल र उपप्रमुख आशा शिवाकोटीबाट झण्डोत्तोलन भएको हो । कार्यक्रमलाई सम्बोधन गर्दै कनकाई नगरपालिकाका प्रमुख पोखरेलले नेपाली जनताको सातदशक लामो संघर्ष, बलिदान र जनआन्दोलनको उपलब्धिका रूपमा गठन भएको संविधान सभाबाट २०७२ साल असोज ३ गते संघीय लोकतान्त्रिक गणतन्त्र नेपालको संविधान जारी भएको जानकारी दिए ।
सोही दिनको स्मरणमा सरकारले ३ असोजलाई संविधान दिवस तथा राष्ट्रिय दिवसको रूपमा मनाउँदै आएको बताउँदै नगर प्रमुख पोखरेलले सहिदहरुले देखेको सपना पूरा गर्ने कार्यमा तीन तहकै सरकारलाई थप शक्ति प्राप्त होस् भन्ने कामना गरे । नगर प्रमुख पोखरेलले मौलिक अधिकारको विषय संविधानमा ग्यारेन्टी गरिए पनि कार्यान्वयन हुने सवालमा कमजोर देखिएको बताए । अहिलेको संविधानले नै सबैलाई अधिकार सम्पन्न गराएको भन्दै नगर प्रमुख पोखरेलले सबैखाले विचार, समुदाय, भूगोल, लिङ्ग, जाति र धर्मका भावनाहरुलाई यसले संरक्षण गर्न आवश्यक रहेको जानकारी दिए ।
नगर प्रमुख पोखरेलले संविधानमा भएका कतिपय अधिकारको कार्यन्वयन अझै पनि नभएको र हुने प्रक्रियामा रहेको समेत बताए । संविधानमा धेरै मौलिक अधिकार रहेको भन्दै नगर प्रमुख पोखरेलले तीनै तहका सरकारले कतिपय कुराहरु कार्यन्वयनमा ल्याउन बाँकी रहेको जानकारी दिए । नगर प्रमुख पोखरेलले स्थानीय तह आएसँगै धेरै विकास निर्माण र नागरिकका अधिकारका कुरा भएको जानकारी दिदै अझै पनि धेरै काम गर्न बाँकी नै रहेको बताए ।
स्थानीय तहमा नापी, मालपोत कार्यालयहरु राख्ने अधिकार भएपनि राख्न नसकिएको र त्यसका लागि आफुहरुले माग गरिरहेको जानकारी दिए । कनकाईमा स्थानीय तह हुनु अघि १४ किलोमिटर बाटो कालोपत्रे रहेकोमा हाल ६० किलो मिटरभन्दा बढी कालोपत्रे तथा पेवर्सको काम भएको नगर प्रमुख पोखरेलले कार्यक्रममा जानकारी दिए ।
त्यस्तै कार्यक्रममा कनकाई नगरपालिकाकी उपप्रमुख आशा शिवाकोटीले दुई पटक संसोधन भएर आएको यो संविधानले जनताको मर्म र भावनालाई समेत सम्वोधन गरेकोले कार्यान्वयन तर्फ सबै एकजुट हुनु पर्नेमा जोड दिइन् । उपप्रमुख शिवाकोटीले संविधान सभाको प्रक्रियामा सहभागी दलका पाँच सय ३७जना सभासदले हस्ताक्षर गरेको ‘नेपालको संविधान, २०७२’ मा ३५ भाग ३०८ धारा र ९ अनुसूची रहेको जानकारी दिइन् । उपप्रमुख शिवाकोटीले गतिशिल रुपमा रहेको यो संविधान जारी भएको तत्कालिन समयलाई स्मरण गर्दै विभिन्न राजनीतिक दलको अथक प्रयासबाट जारी भएको यो संविधान अन्ततःमुलुककै उत्कृष्ट भएको दाबी गरिन् ।
नगर प्रमुख पोखरेलको अध्यक्षतामा भएको कार्यक्रममा वडा नं. १ का वडा अध्यक्ष शुशिलकुमार पोखरेल , वडा नं.२ का अध्यक्ष वलराम राई ( प्रताप), वडा नं. ८ का अध्यक्ष लिलाबहादुर कटुवाल , वडा नं.३ का कार्यबाहक वडाअध्यक्ष कृष्णमाया भुजेल, कार्यपालिका सदस्य, वडा सदस्यहरु, कर्मचारीहरु सहितको सहभागीता रहेको थियो । उप– प्रमुख शिवाकोटीले शाव्दीक स्वागत गरेको कार्यक्रमको संचालन कर्मचारी मनिता राईले गरेकी थिइन् ।
