कनकाई खबर \ झापाको सुरुङ्गामा सम्पन्न एक तीज विशेष कार्यक्रममा सहभागी वक्ताहरुले चाडपर्व भड्किलो बन्दै गएकोमा चिन्ता व्यक्त गरेका छन् ।
कनकाई बहुमुखी क्याम्पस सुरुङ्गास्थित स्वतन्त्र विद्यार्थी युनियनले आयोजना गरेको शुभकामना आदानप्रदान सहितको तीज विशेष कार्यक्रममा पछिल्लो समय चाडपर्व भड्किलो बन्दै गएकोमा चिन्ता व्यक्त गरिएको हो ।
तीज भनेको नेपाली महिलाहरुको आफ्नो भावना पोख्ने पर्वको रुपमा परिचित भएपनि पछिल्लो समयमा आएर महिलाहरुको भावना पोख्नेभन्दा पनि यो व्यावसायिक हुँदै गएको बताइएको छ । स्वतन्त्र विद्यार्थी युनियन, कनकाई बहुमुखी क्याम्पसका सभापति चेतन आचार्यको अध्यक्षतामा संचालन भएको कार्यक्रम क्याम्पस संचालक समितिका उपाध्यक्ष खड्गप्रसाद प्रसाईँको प्रमुख आतिथ्यमा सम्पन्न भएको हो ।
कार्यक्रममा कनकाई बहुमुखी क्याम्पसकी नेपाली विभाग प्रमुख कमला सुवेदीले चाडपर्वका नाममा भएको विकृति र विसंगतिलाई हटाउँनु पर्ने तर्फ जोड दिइन् । तडक भडक होइन, संस्कृति र संस्कारको संरक्षणमा सबै एकजुट हुनु पर्नेमा जोड दिँदै समय र पुस्ताअनुसार परिवर्तन स्वाभाविकै हो, तर कुनै पनि कुराको मूल तत्व, मर्म नै हराउने गरेर भएको परिवर्तनलाई मौलिक मान्न नसकिने सुवेदीको तर्क थियो । तीजको मौलिकता, सामाजिक तथा सांस्कृितक पाटोलाई जोगाउन नयाँ पुस्ताले सोच्नुपर्ने बेला आएको भन्दै सुवेदीले यस तर्फ सम्पूर्ण विद्यार्थीहरुको चेतना जागृत हुनु पर्ने तर्फ जोड दिइन् ।
कार्यक्रममा शुभकामना मन्तव्य राख्दै क्याम्पस प्रमुख विकासप्रसाद उप्रेतीले समयको परिवर्तनसँगै चाडपर्वका नाममा समेत परिवर्तन आउनु राम्रो कुरा भएपनि आफ्नो संस्कृति, परम्परा र यसको भावनालाई सबैले आत्मसाथ गर्नु पर्ने धारणा राखे । वर्तमान पुस्ताको जिम्मेवारी भनेको हाम्रो भाषा, साहित्य, कला र संस्कृतिलाई भावी पुस्तामा जस्ताको तस्तै हस्तान्तरण गर्नु रहेको भन्दै क्याम्पस प्रमुख उप्रेतीले तीजका पुराना गीतहरु हाम्रो मौलिक संस्कृतिको धरोहर भएको बताए ।
कार्यक्रममा स्थानीय सरकारका प्रतिनिधि कनकाई वडा नं.४ का वडाअध्यक्ष रोशन सुवेदीले समेत नेपाली नारीहरुको महान पर्व तीजको अवसरमा शुभकामना मन्तव्य राख्दै नेपालका प्रायःसबै समुदायका महिलाहरुले मनाउने साझा पर्वका रुपमा विकास भइरहेको तीज पर्वको त्यतिकै धार्मिक महत्व समेत रहेको बताए । तीजमा खासगरी भगवान शिवको आराधना गरिन्छ । यसको अर्को पक्ष नाचगान र मनोरञ्जन पनि भएको वडाअध्यक्ष सुवेदीले जानकारी दिए । अबको पुस्ताले चाडपर्वको अर्थ फरक तरिकाले बुझ्न सक्ने अवस्था सिर्जना भएको भन्दै वडाअध्यक्ष सुवेदीले चिन्ता व्यक्त गरे । आफ्नो धरातललाई बिर्सिएर अघि बढ्दै गरेका युवा पुस्तालाई सुझाव दिँदै वडाअध्यक्ष सुवेदीले विकृति र विसंगतिलाई हटाई हाम्रो संस्कार, संस्कृति, रीतिरिवाज र चाडपर्वलाई मौलिक एवं स्वच्छ र स्वस्थ राख्न जरुरी रहेको बताए ।
कार्यक्रमको प्रमुख अतिथीका रुपमा रहेका क्याम्पस संचालक समितिका उपाध्यक्ष खड्गप्रसाद प्रसाईँले भगवान शिवलाई पतिको रूपमा प्राप्त गर्न हिमालयकी छोरी पार्वतीले कठोर तपस्या गरी बरदान पाएको दिनलाई हरितालिका तीजका रुपमा मनाउँने परम्परा चल्दै आएको बताए ।
यसै अवसरमा विवाहित महिलाले आफ्नो पतिको सुस्वास्थ्य र दीर्घायुको कामनासहित व्रत बस्ने र अविवाहित महिलाले सुयोग्य पति प्राप्त होस् भन्ने कामनासहित व्रत बसी पूजाआजा गरी मनाइने पवित्र पर्वका रुपमा हरितालिका तीजको महत्व रहेको प्रसाईँको ठहर छ । तर पछिल्लो समय धार्मिक, सांस्कृतिक र सामाजिक महत्व बोकेको पर्व भड्िकलो र खर्चिलो बन्दै गएका कारण तीजको सांस्कृतिक र सामाजिक पक्ष कमजोर हुन सक्ने भन्दै यस तर्फ सबैको ध्यानाकर्षण हुनु जरुरी रहेको प्रसाईको बुझाई छ ।
स्ववियु कोषाध्यक्ष प्रिया पुरीको स्वागत तथा सचिव बासु निरौलाको संचालन रहेको कार्यक्रममा क्याम्पसका विद्यार्थीहरुबाट नृत्य, गीत, गजल सहित विभिन्न साँगितीक प्रस्तुतीहरुसहित कार्यक्रम सम्पन्न भएको जनाइएको छ ।